Գերմանիայի էկոնոմիկայի նախարար Պետեր Ալթմայերը հանգիստ է արձագանքել ԱՄՆ-ի դեսպան Ռիչարդ Գրենելայի «Հյուսիսային հոսք-2» գազատարի կառուցման մեջ ներգրավված գերմանական ընկերություններին ուղղված նամակին: «Գերմանիան այն երկիրն է, որտեղ երաշխավորված է կարծիքի եւ մամուլի ազատություն: Հետեւաբար, յուրաքանչյուր հայտարարության վերաբերյալ մեկնաբանություն անելու կարիք չկա: Բայց փաստ է նաեւ այն, որ Գերմանիան իրավական պետություն է», - ասել է նա dpa գործակալության հետ հարցազրույցում:
Ալթմայերը նշել է, որ խողովակաշարի մեծ մասը կանցնի միջազգային ջրերով, իսկ առանձին պետությունների անհրաժեշտ թույլտվությունն արդեն ստացվել է: «Դաշնային կառավարությունը պարտավորություններ ունի չմիջամտելու նմանատիպ բիզնես ծրագրերին», - ասել է նախարարը, հաղորդում է DW- ն:
Ալթմայերի խոսքերով, Բեռլինում հաշվի են առնում նաեւ Ուկրաինայի հիմնավոր մտահոգությունը, որը, նույնիսկ նոր գազատարի շինարարությունից հետո, պետք է մնա գազի տարանցիկ երկիր: Նախարարը նշել է, որ ՌԴ եւ Ուկրաինա կատարած այցերի ժամանակ, նա Մոսկվայի, Կիեւի եւ Եվրահանձնաժողովի միջեւ այդ հարցի շուրջ ուղիղ բանակցությունների համար հող է նախապատրաստել:
Նախարարը ընդգծել է, որ գազի մատակարարման դիվերսիֆիկացիան համապատասխանում է Գերմանիայի շահերին: Հետեւաբար անհրաժեշտ է ստեղծել ԱՄՆ-ից կամ Մերձավոր եւ Միջին Արեւելքի երկրներից հեղուկացված գազի ներկրման ենթակառուցվածք: «Այդ գազի գինը, - նշել է Ալթմայերը, - իհարկե, պետք է մրցունակ լինի շուկայում»: