Վրաստանը չի պատրաստվում հրաժարվել տրանզիտային գործառույթներից, եւ, իհարկե, մենք կշարունակենք ստանալ այն օգուտները, որոնք կապված են այդ գործառույթի իրականացման հետ», - այսպես է պատասխանել վարչապետ Մամուկա Բախտաձեն՝ «Գազպրոմի» հետ տարանցիկ համաձայնագրի կնքման հարցին, հաղորդում է վրացական Առաջին ալիքը։
Կառավարության ղեկավարը նշել է, որ Վրաստանը բավականին մեծ օգուտ է ստանում տրանզիտային գործառույթներից, որոնք երկրի շահերից են բխում եւ «Գազպրոմի» հետ նոր համաձայնագիր ստորագրելու դեպքում, Էկոնոմիկայի նախարարությունը մանրամասն կտեղեկացնի այդ մասին հանրությանը: Մամուկա Բախտաձեն արձագանքել է նաեւ ընդդիմության ակնկալիքներին․ «Ինչ վերաբերում է վախերին եւ սպասելիքներին, ես միշտ ուշադրություն եմ դարձնում բովանդակային մասին, եւ եթե ուզում եք, քաղաքական մասին էլ ուշադրություն կդարձնեմ: Նույն քաղաքական թիմը, իր ժամանակին՝ լինելով իշխանություն, հայտարարել էր, թե իբր նախատեսվում է վաճառել գազամուղը: Ես փորձում եմ իմ պատասխանը բովանդակալից դարձնել՝ այնպիսին, որը հետաքրքրի մեր բնակչությանը: Վրաստանը շարունակում է կատարել տարանցիկ գործառույթը եւ ստանալ օգուտներ, որոնք կապված են այդ գործառույթի հետ», - հայտարել է վարչապետը:
Վրաստանի եւ «Գազպրոմի» միջեւ տարանցիկ համաձայնագրի ժամկետը լրացել է 2019թ․-ի հունվարի 1-ին: Ըստ այդմ, այս պահի դրությամբ, Ռուսաստանից Հայաստան բնական գազի տարանցումը տեղի է ունենում առանց տարանցիկ համաձայնության:
Վարչապետի խոսքերով, նոր պայմանագրի առնչությամբ, եթե որեւէ փոփոխություն կատարվի, այդ մասին Վրաստանի տնտեսական զարգացման նախարարությունը լրատվամիջոցների միջոցով մանրամասն կտեղեկացնի հասարակությանը: «Որքանով ինձ է հայտնի, դեռեւս այդ մասին չի խոսվել»։ Բանակցությունները («Գազպրոմ Էքսպորտ» ընկերության հետ) կսկսվեն, երբ որոշվի կոնկրետ ամսաթիվը եւ կնշանակվի հանդիպումը: Վրաստանը շարունակում է իր տրանզիտային գործառույթը կատարել եւ, համապատասխանաբար, ստանալ այդ տարանցիկ պայմանագրից բխող օգուտները», - ընդգծել է Բախտաձեն, հաղորդում է Ինտերֆաքսը:
