Քանի դեռ Արցախի ներկայացուցիչը նստած չէ բանակցային սեղանի շուրջ, ես չեմ հավատում, որ քննարկվելու է հարցի լուծումը: Այս մասին NEWS.am-ի հետ զրույցում նշեց «Մարդկային զարգացման միջազգային կենտրոնի» ղեկավար Թեւան Պողոսյանը՝ անդրադառնալով Հայաստանի եւ Ադրբեջանի ԱԳ նախարարների վերջին հանդիպմանը:
Դիտարկմանը, որ ՀՀ վարչապետ Նիկոլ Փաշինյանը հայտարարել է, որ չի կարող բանակցել Արցախի փոխարեն, սակայն արդեն որերորդ հանդիպումն է տեղի ունենում Հայաստանի ու Ադրբեջանի ԱԳ նախարարների միջեւ, իսկ Արցախը այդ հանդիպումներին չի մասնակցում, Թեւան Պողոսյանը պատասխանեց. «Իսկ ինչի՞ մասին են բանակցությունները, հարցի լուծմա՞ն: Կարող են քննարկվել հազարավոր այլ հարցեր, անվտանգության, փախստականների, քաղհասարակությունների միջեւ շփումների, տնտեսական եւ այլն: Այդ առումով իշխանությունները հետ չեն կանգնել իրենց ասածից, որ Արցախը պետք է վերադառնա բանակցություններին: Այստեղ, պարզապես պետք է ասել, որ օրինակ, Հայաստանը պատրաստ է բանակցություններում խոսել այս-այս հարցերի մասին, իսկ այս–այս հարցերի վերաբերյալ խոսակցությունը պետք է լինի Արցախի իշխանությունների հետ: Այսինքն բանակցելը վատ չէ, եւ եթե «զոհեր» էլ պահանջվելու են, թող դրանք լինեն մեր դիվանագետների նյարդերը, ոչ թե մեր զինվորների կյանքը»:
Նա համոզմունք հայտնեց, որ եթե խոսքը Արցախի կարգավիճակի մասին է, բնական է, որ այն չի կարող որոշվել առանց Արցախի:
«Ինձ համար զարմանալի էր, որ նախօրեին ԱԺ-ում մարդիկ փորձում էին նկարագրել, որ ժամանակին ինչ-որ բուֆերային գոտիներ են ձեւավորվել: Եթե այստեղ, Հայաստանում բոլորն ընդունում են Արցախը, ուրեմն պետք է առաջնորդվեն նաեւ Արցախի Սահմանադրությամբ: Արցախում չկան այլ հողեր, քան արցախյանը: Դրա համար եկեք մենք էլ մեր բառապաշարը ուղղենք եւ չօգտագործենք այս տեսակի կամ այն տեսակի գոտիներ արտահայտությունները»,-հայտարարեց Պողոսյանը:
Նա նկատեց, որ միջազգային հանրությունը մի կողմից կոչ է անում՝ երկու ժողովուրդներին պատրաստել խաղաղության, մյուս կողմից շատ լավ գիտակցում են, որ մինչեւ նոր սերունդ չլինի Ադրբեջանում, որն իրական պատմությունն է իմանալու, կամ դասագրքերում հայատյացություն չեն քարոզելու, հարցը չի լուծվելու. «ԱՄՆ-ում, Ֆրանսիայում ու Ռուսաստանում այս ամենը շատ լավ գիտեն»,-ասաց նա: