Արցախն, այսպես, թե այնպես, կա բանակցություններում, քանի որ Մինսկի խմբի համանախագահները գնում են Արցախ, բացի այդ, ՀՀ ներկայացուցիչները մինչեւ որեւէ բանակցության գնալը Արցախի իշխանությունների հետ խոսում են եւ վերադառնալուց հետո, նորից խոսում են: Այս մասին NEWS.am-ի հետ զրույցում նշեց «Մարդկային զարգացման միջազգային կենտրոնի» ղեկավար Թեւան Պողոսյանը՝ անդրադառնալով Հայաստանի եւ Ադրբեջանի ԱԳ նախարարների վերջին հանդիպմանը:
«Մենք քիչ-քիչ պետք է բանակցությունները բերենք ճիշտ ձեւաչափի, որ երեք կողմերը նստեն նույն սեղանի շուրջ: Պետք է բոլորը հասկանան, որ քանի դեռ դա չկա, հարցի լուծման մասին անգամ չեն խոսելու: Այդ ուղղությամբ պետք է աշխատել, ոչինչ միանգամից չի լինում»,-ասաց նա:
Դիտարկմանը, որ Դուշանբեի Փաշինյան-Ալիեւ բանավոր պայմանավորվածություններից հետո հարաբերական անդորր է, սակայն վերջերս մամուլը գրեց, որ ՊՆ-ում փակ քննարկում է եղել, որտեղ քննարկվել է ապրիլ-մայիսին հնարավոր պատերազմի հարցը, Թեւան Պողոսյանը նկատեց, որ ՊՆ-ի գործն է միշտ պատրաստ լինել պատերազմի՝ անկախ նրանից, թե մամուլն ինչ է գրում:
«Եթե դու այսօր պատրաստ լինես նման զարգացումների, այսօր դա չի լինի: Եթե վաղն էլ պատրաստ լինես, վաղն էլ չի լինի: Ինչքան Ադրբեջանն իմանա, որ Հայաստանից որեւէ բանով ավել չի, մենք ունենալու ենք նման զինադադար: Հենց իմանա, որ ինչ-որ բանով ավել է, ունենալու ենք սահմանին սրացումներ: Ադրբեջանը չի սպասելու տեսնի, որտեղ ինչ ենք պայմանավորվել»,-ասաց փորձագետը:
Նրա խոսքով, եթե Ադրբեջանը վարքագիծ է փոխել, պետք է հասկանալ, թե որն է դրա պատճառը, այդ ինչն է իրականում փոխվել. «Եթե Արցախի հիմնախնդրի վերաբերյալ որեւէ բան չի փոխվել, ուրեմն երեւի այլ տեղերում է փոխվել, որ նա այս տեսակի վարքագիծ է դրսեւորում: Դա կարող է կապված լինել Ադրբեջանի ներքին խնդիրների հետ, այլ տեղերից ճնշումների հետ կամ էլ այլ սցենար են փորձում օգտագործել: Մեզ համար չէ, որ Ադրբեջանն այսպես է գործում, իր համար է անում, մենք էլ պետք է ավելի խելոք լինենք ու մտածենք, թե ինչ պետք է անենք, որ մեր շահերի համար լավ լինի»: