Եվրամիությունում խոշոր կորպորացիաները գրեթե չեն վճարում հարկերն ամբողջ ծավալով: Գոյություն ունի հսկայական անհամապատասխանություն օրենքով սահմանված հարկերի եւ բազմազգ ձեռնարկությունների իրական վճարների միջեւ, հաղորդում է Süddeutsche Zeitung թերթը` վկայակոչելով Եվրախորհրդարանում «Կանաչների» խմբակցության կողմից անցկացված ուսումնասիրության արդյունքները:
Նոմինալ եւ փաստացի վճարված հարկերի միջեւ ամենամեծ անհամապատասխանությունները գրանցվել են Լյուքսեմբուրգում: Այստեղ, 2011- 2015թթ․-ին պաշտոնական հարկային դրույքաչափը կազմել է 29 տոկոս, միեւնույն ժամանակ, խոշորագույն կոնցեռները փաստացի վճարել են ընդամենը երկու տոկոսը, հաղորդում է DW- ն:
Մալթայում, Ավստրիայում, Նիդեռլանդներում եւ Ֆրանսիայում կոնցեռների հարկային մուծումները նախատեսվածից երկու անգամ քիչ են եղել։
Գերմանիայում հարկային դրույքաչափը մոտ 30 տոկոս է կազմում, բայց, իրականում, հարկային մարմինների կողմից հաշվարկվել է միայն 20 տոկոսը:
Միայն Բուլղարիայում հետազոտության հեղինակները որեւէ անհամապատասխանություն չեն գտել նոմինալ հարկերի եւ նրանց միջեւ, որոնք փաստացի վճարում են խոշոր կորպորացիաները:
Եվրոպական խորհրդարանում «Կանաչների» խմբակցության ֆինանսական քաղաքականության հարցերով փորձագետ Սվեն Գիգոլդը (Sven Giegold) միջազգային ընկերությունների կողմից կիրառվող հարկային պրակտիկայի ավելի թափանցիկ լինելու կոչ է արել:
