Թեհրանի հրթիռային ծրագրի առկայությունը, որն անհրաժեշտ է սեփական անվտանգության ապահովման համար, բանավեճի առարկա չի հանդիսանում: Tasnim-ը հայտնում է, որ այս մասին ասել է Իրանի ԱԳՆ-ի պաշտոնական ներկայացուցիչ Բահրամ Կասեմին:
«Հրթիռային ծրագրի ոլորտում մեր քաղաքականությունը հստակ է եւ պաշտպանական նպատակներով Իրանի հրթիռային զինման մասին հարցը չի կարող քննարկումների առարկա լինել: Դա անհրաժեշտ է մեր երկրի անվտանգության համար, -ասել է Կասեմին:
Անկասկած, մենք չենք վերանայի մեր մոտեցումն այս խնդրի նկատմամբ, քանի որ պետք է ի վիճակի լինենք պաշտպանել մեզ տարածաշրջանում, ուր արեւմտյան երկրները առաքում են իրենց զենքը»:
Ուրբաթ Reuters-ը, վկայակոչելով Ֆրանսիայի ԱԳ նախարար Ժան Իվ լե Դրիանին հայտնել էր, որ Փարիզը պատրաստվում է Թեհրանի նկատմամբ հերթական պատժամիջոցները կիրառել այն դեպքում, եթե Թեհրանի հրթիռային ծրագրի բանակցություններում առաջընթաց չգրանցվի:
Հունվարի կեսին Ֆրանսիայի ԱԳՆ-ն արդեն Իրանին կոչ էր արել «անհապաղ դադարեցնել ցանկացած գործունեություն, որը կապված է միջուկային զենքի առաքման բալիստիկ հրթիռների հետ, ներառյալ բալիստիկ հրթիռների տեխնոլոգիաների օգտագործմամբ արձակումները», գրում է ՏԱՍՍ-ը:
