Պետք է ուսումնասիրել 2015-2017 թվականների տվյալները ու տեսնել, թե հարկային արտոնությունների այս գործիքակազմով ակնկալվող ներդրման որ մասն է արվել, աշխատատեղերի որ մասն է բացվել: Այս մասին, այսօր՝ փետրվարի 6-ին, կառավարության նիստում, «ԼԻԿՎՈՐ» ՓԲԸ-ին մաքսատուրքի արտոնություններ տալու հարցի քննարկման ժամանակ նշեց ՀՀ վարչապետ Նիկոլ Փաշինյանը:
Նրա խոսքով, միայն այդպիսի վերլուծությունից հետո կարելի կլինի հստակ չափել այդ գործիքի արդյունավետությունը:
Վարչապետի աշխատակազմի ղեկավար Էդուարդ Աղաջանյանը նշեց, որ արդեն նման ուսումնասիրություն արվել է. «Շեղումներ կան, դրանք բազմաթիվ են»:
Նիկոլ Փաշինյանն էլ արձագանքեց. «Պետք է հասկանանք, հակառակ դեպքում ստացվում է՝ հարկային արտոնություն ենք տալիս ու եթե դա նպատակային չի օգտագործվում, դրա դիմաց ոչինչ տեղի չի ունենում»:
