Գերմանիայի հակամենաշնորհային դաշնային գերատեսչությունը Facebook ընկերությանն արգելել է կողմնակի աղբյուրներից տվյալներ հավաքել՝ առանց օգտատիրոջ համաձայնության: Այս մասին նշված է կարգավորողի հայտարարության մեջ, փոխանցում է ՏԱՍՍ-ը:
Գերատեսչությունից նշել են, որ Facebook-ը Գերմանիայում գերակայող դիրք ունի եւ այն չարաշահում է: Գերմանիայում Facebook-ն այլեւս չպետք է իր օգտատերերին պարտավորեցնի համաձայնվել «երրորդ» աղբյուրներից տեղեկություններ հավաքելուն, ինչը տեղի է ունենում մեկ հաշվի հետ տարբեր ինտերֆեյսների միավորման դեպքում, քանի որ խոսքն «անազնիվ մրցակցության» մասին է, կարծում է կարգավորողը:
Կապող օղակների միջոցով տվյալները հոսում են Facebook, եթե անգամ օգտատերը հաճախել է այլ կայքեր, օրինակ՝ դա տեղի է ունենում, եթե մարդն օգտագործում է «Ինձ դուր է գալիս» կոճակը կամ Facebook-ի միջոցով այլ էջեր է մտնում:
Ընկերությանը 12 ամիս է տրամադրվել օգտատերերի պայմանները փոփոխելու համար, իսկ 4 ամսվա ընթացքում պարտավոր է խնդրի լուծման վերաբերյալ առաջարկներ ներկայացնել: Facebook-ը նաեւ կարող է հակամենաշնորհային գերատեսչության պահանջը բողոքարկել դատարանում:
Գերմանական կարգավորողը 2016 թվականին Facebook-ի դեմ քննություն էր սկսել Գերմանիայում օգտատերերի տեղեկություններն ապօրինի հավաքելու կասկածանքով: Գերատեսչության ներկայացուցիչների կարծիքով՝ օգտատերերին Facebook-ի առաջարկած պայմանները «խախտում են ինչպես տվյալների պաշտպանության սկզբունքները, այնպես մրցակցության ոլորտում ընդունված ստանդարտները»:
