5 տոկոսանոց տնտեսական աճը հեռու է տնտեսական հեղափոխության մասին կարգախոսներից։ Այս մասին փետրվարի 13-ին լրագրողների հետ հանդիպմանն ասել է ՀՅԴ անդամ, էկոնոմիկայի նախկին նախարար Արծվիկ Մինասյանը։
Ըստ նրա՝ պետք է հասկանալ, որ մինչեւ ներդրումների մասին խոսելը հարկավոր է ստեղծել համապատասխան իրավական բազա եւ ինստիտուցիոնալ բարեփոխումներ կատարել։ «Բայց այնպիսի զգացողություն է առաջանում, թե իշխանություններն ուզում են խուսափել պատասխանատվությունից։ Մինչեւ օպտիմալացում անելը պետք է հասկանալ, թե ինչ նպատակներ է հետապնդում կառավարությունը, հետո արդեն լուծարել այս կամ այն նախարարությունը։ Նպատակահարմար չէր, օրինակ, օպտիմալացնել գյուղատնտեսության նախարարությունը, դրա փոխարեն հարկավոր էր ուժեղացնել նրա դերը»,- հավելել է նա։
Արծվիկ Մինասյանը նկատել է, որ տեխնոլոգիական զարգացում հայտարարելուց առաջ՝ պետք է մտածել այն գործազուրկների մասին, որոնք ի հայտ կգան հետո։
