Հայաստանի փոքր շուկան նոր ընկերություններին թույլ չի տալիս գալ էլեկտրոնային վճարման ոլորտ: Փետրվարի 15-ին լրագրողների հետ հանդիպման ժամանակ այս մասին ասաց «Ակբա-Կրեդիտ Ագրիկոլ բանկ» ՓԲԸ բանկային սպասարկման եւ թվային գործարքների կառավարման բաժնի ղեկավար Լիլիթ Գեւորգյանը: Նրա խոսքով՝ որպեսզի ընկերությունները հայկական շուկա մտնեն, պետք է համոզվեն, որ համապատասխան շրջանառություն կունենան:
ONEX-ի գործադիր տնօրեն Սամվել Մարտիրոսյանն, իր հերթին, նշեց, որ էլեկտրոնային առեւտրի զարգացման ոլորտում իրավաբանական խոչընդոտներ կան, ինչպես նաեւ բեռնափոխադրումների խնդիր: «Այսօր մեզ մոտ փաստացի բացակայում է ավիաբեռնափոխադրումը, առանց որի էլեկտրոնային առեւտրի զարգացումն անհնար է: Դրանից բացի, մեր ամբողջ արտահանումն ուղղված է դեպի ԵՏՄ երկրներ, որտեղ առեւտուրը մեծ մասամբ կատարվում է վերգետնյա փոխադրամիջոցներով»,- նշեց նա: