ԱՄՆ-ից հնէաբաններն աշխատում էին Ալյասկայում գետի զառիթափ ափին, երբ քարացած մնացորդներ են հայտնաբերել: Պարզվել է, որ դրանք պատկանում էին պարկամկան հիշեցնող գազանիկի: Կենդանուն անվանել են Unnuakomys hutchisoni (գիշերային մուկ) եւ դասել գիտությանը հայտնի ամենահյուսիսային պարկավորներին, հայտնում է Phys.org-ը:
Մնացորդների անալիզի համաձայն՝ գիշերային մկներն Ալյասկայում են բնակվել 69 մլն տարի առաջ: Դրանց քաշը կազմում էր մոտ 30 գրամ: Այս փոքրիկ կենդանիներն անչափ դիմացկուն էին: Այս պարկավորները ամբողջ 120 ձմեռային օր անցկացրել են բեւեռային գիշերվա պայմաններում:
«Չնայած ծանր պայմաններին, կենդանիները դրանց լավ ընտելացել էին: Նրանք մթության մեջ կողմնորոշվել են, քանի որ դրան վարժվել էին: Նոր տեսակի հայտնագործությունը մեզ համար կարեւոր է: Գիշերային մկների շնորհիվ մենք կարող ենք ավելի լավ հասկանալ, թե դինոզավրերի ժամանակներում Ալյասկայի ֆլորան եւ ֆաունան ինչպիսին էին»,- ասել է հնէաբան Ջելին Էբերլեն: