ՀՀ կրթության եւ գիտության նախարարությունը եւ Ucom ընկերությունը կհամագործակցեն հանրակրթական դպրոցների համակարգիչների համար անցանկալի կայքերի անհասանելիության ապահովման ուղղությամբ։ 

Փետրվարի 21-ին ՀՀ կրթության եւ գիտության նախարարությունում ԿԳ նախարար Արայիկ Հարությունյանն ու Ucom ընկերության համահիմնադիր եւ գլխավոր տնօրեն Հայկ Եսայանը փոխըմբըռնման հուշագիր ստորագրեցին։

Մասնավորապես՝ ՀՀ կրթության եւ գիտության նախարարության թույլտվությամբ Ucom ընկերությունը համակարգչային անվտանգության ոլորտում բարձր վարկանիշ ունեցող «Սայբերսեկ» ՍՊԸ-ի որակավորված մասնագետների աջակցությամբ եւ ընկերության «DNS» սերվերի միջոցով կապահովի անցանկալի կայքերի հնարավորինս անհասանելիությունը դպրոցներում: Բացի այդ, Ucom ընկերությունը մշտապես կհետեւի ծրագրի անխափան իրագործմանը եւ հնարավորինս սեղմ ժամկետներում կարձագանքի եւ համապատասխան միջոցներ կձեռնարկի նախարարության կողմից ծրագրի իրագործման ընթացքում հայտնաբերված թերությունների մասին իրազեկում ստանալու դեպքում:

ԿԳ նախարար Արայիկ Հարությունյանը կարեւորեց ՀՀ հանրակրթական դպրոցներում  աշակերտների համար կրթական առցանց ռեսուրսների մատչելիությունը եւ դրանց անվտանգ հասանելիության ապահովումը։

Նա պարզաբանեց, որ այս պիլոտային ծրագիրը ներկայումս իրականացվում է 20 դպրոցում, իսկ հետագայում կներառի 1400 դպրոց։

Ucom ընկերության գլխավոր տնօրեն Հայկ Եսայանն իր հերթին նկատեց՝ սա կարեւոր խնդիր է լուծում ոչ միայն մեր հասարակության համար, այլ նաեւ կարեւոր է, որ ձեւավորման փուլում գտնվող երեխաները չառնչվեն այնպիսի կենտենտի, որը նրանց վրա հոգեբանական ազդեցություն կունենա։ 

Նա վստահություն հայտնեց, որ սա սահմանափակում չէ, այլ այն ժամանակը, որ նրանց կանցկացնեն ինտերնետում, ավելի լավ կոնտենտ դիտելու համար է։ 
«ՀՀ ԿԳՆ հետ այս համագործակցությունն, անշուշտ, ավելացնում է պատասխանատվությունը բոլոր դպրոցականների նկատմամբ», - նշեց Հայկ Եսայանը։

Նա պարզաբանեց, որ ֆիլտրվելու են բոլոր այն կայքերը, որոնք քարոզում են բռնություն կամ ահաբեկչություն, տարածում են վիրուսներ, բաց տեսարաններով մեծահասակների համար կոնտենտ են մատուցում։ Ծրագիրը իրականացվելու է այն դպրոցներում, որտեղ ինտերնետ է մատակարարում Ucom ընկերությունը։