Փետրվարի 23-ի առավոտյան ըստ ավանդույթի Երեւանում նշեցին ՌԴ-ում տոնվող Հայրենիքի պաշտպանի օրը: Հիշեցնենք, որ Հայաստանում համանման տոն է հունվարի 28-ը, սակայն փետրվարի 23-ը շատերի համար հարազատ տոն է մնում եւ այսօր Հաղթանակի այգում անհայտ զինվորի գերեզմանի մոտ ծաղիկներ դնելու էին եկել ՌԴ դեսպանատան ներկայացուցիչները, Հայաստանի ԶՈւ ծառայողները, վետերաններ, երիտասարդներ (ֆոտոռեպորտաժ):
Լրագրողների հետ զրույցում ՌԴ դեսպան Սերգեյ Կոպիրկինը շնորհավորեց հայրենիքը՝ Հայաստանի Հանրապետությունը եւ Ռուսաստանը պաշտպանող բոլոր մարդկանց:
«Ինչպես գիտեք, մենք շատ սերտ դաշնակցային հարաբերություններ ունենք, որոնք բազմադարյա պատմություն ունեն: ՌԴ Զինված ուժերի պատմությունը անքակտելիորեն կապված է հայ ժողովրդի պատմության հետ: Հայերը մեծ դեր են ունեցել Ռուսաստանի Զինված ուժերի կայացման գործում, Ռուսաստանի եւ Խորհրդային զենքի փառավոր հաղթանակներում, որոնցով նշանավորվել է մեր Զինված ուժերի ողջ պատմությունը:
Եվ այսօր մեր միությունը մեր երկրների եւ տարածաշրջանի անվտանգության երաշխիքն է», - ընդգծեց դեսպանը: Նա հիշեցրեց, որ Հայաստանում տեղակայված է 102-րդ բազան, ռուս սահմանապահները ներգրավված են Հայաստանի սահմանների պաշտպանությանը:
«Սա, իհարկե, Ռուսաստանի Դաշնության շատ կարեւոր ներդրումն է Հայաստանի անվտանգությունում: Սա մեր ռազմական եղբայրության, մեր ժողովուրդների միջեւ եղբայրական հարաբերությունների արտացոլումն է, որով բնութագրվում է մեր հարաբերությունների դարավոր պատմությունը: Այս օրը, իհարկե, ես ուզում եմ շնորհավորել բոլոր նրանց, ովքեր մարտական ծառայություն են իրականացնում, եւ մեզ բոլորիս, ողջ հայ ժողովրդին այս փառավոր տոնի առթիվ», - ասաց դիվանագետը:
Պատասխանելով մարտական համագործակցության մասին՝ Կոպիրկինը նշեց, որ այն շարունակակական բնույթ է կրում:
«Ծրագրերն անընդհատ իրականացվում են: Զինծառայողները հայ զինծառայողների հետ սերտ համագործակցությամբ ծառայություն են իրականացնում սահմանին, համատեղ զորավարժություններում, ամենօրյա շփումներում՝ ինչպես բազայի հրամանատարության, այնպես էլ զինծառայողմների մակարդակով», - ասաց դեսպանը: