Հայաստանի պաշտպանության նախարար Դավիթ Տոնոյանը բացառում է, որ առանց Հայաստանի համաձայնության հնարավոր կլինի ՀԱՊԿ գլխավոր քարտուղարի հարցը լուծել:
Այսօր՝ մարտի 5-ին, «Եռաբլուր» պանթեոնում լրագրողների հիշեցրին, որ ՀԱՊԿ գլխավոր քարտուղարի Բելառուսի թեկնածու Զասը հայտարարել էր, որ ՀԱՊԿ կանոնադրությունը թույլ է տալիս անդամ երկրների սահմանափակ կազմով ՀԱՊԿ գլխավոր քարտուղարի ընտրության հարցը որոշել, սակայն նշել էր, որ դա լավագույն տարբերակը չէ. հնարավոր համարո՞ւմ եք, որ առանց Հայաստանի համաձայնության ՀԱՊԿ գլխավոր քարտողար նշանակվի:
Ի պատասխան Դավիթ Տոնոյանն ասաց. «Ես այդ հնարավորությունը բացառում եմ. դա գլխավոր քարտուղարի նշանակում է, դա մարտավարական կամ օպերատիվ մարտավարական օղակում որոշում կայացնելու խնդիր չէ: Սա ռազմավարական դաշինքի գլխավոր քարտուղարի ընտրության խնդիր է: Ինչպե՞ս կարելի է առանց դաշինքի մեկ անդամի ընտրել գլխավոր քարտուղար: Կանոնակարգը այդպիսի բան թույլ չի տալիս, կանոնակարգը այլ բան է թույլ տալիս, բայց ոչ գլխավոր քարտուղարի ընտրության հետ կապված»:
Հարցին, թե որն է այս հարցում Հայաստանի դիրքորոշումը, պաշտպանության նախարարն արձագանքեց. «Այս պահին ԱԳՆ-ն համապատասխան աշխատանքներ է տանում ՀԱՊԿ-ում, ՀԱՊԿ-ի քարտուղարությունը համապատասխան աշխատանքներ է տանում, Հայաստանի ՊՆ-ն իր կարծիքը հայտնել է»: