Հայաստանն ու Վրաստանը ոչ միայն հարեւաններ են, այլեւ բարեկամներ: Պաշտոնական այցով Երեւան ժամանած Վրաստանի նախագահ Սալոմե Զուրաբիշվիլին այս մասին ասել է հայ գործընկեր Արմեն Սարգսյանի հետ հանդիպումից հետո լրատվամիջոցների համար տարածած հայտարարության մեջ:
«Մենք ապրում ենք այնպիսի տարածաշրջանում, որի համար խաղաղությունն ու կայունությունը վճռորոշ նշանակություն ունեն: Դա նրա զարգացման եւ մեր երկրների տնտեսության զարգացման պայմաններն են»,- նշել է Սալոմե Զուրաբիշվիլին: Նրա խոսքով՝ տարածաշրջանում մեծ թվով մարտահրավերներ կան, եւ անհրաժեշտ է հիշել, որ գլխավոր ճանապարհը հակամարտությունների խաղաղ կարգավորումն է միջազգային իրավունքի նորմերի հիման վրա: Հակամարտությունները դանդաղեցնում են մեր զարգացումը, դրանք անհրաժեշտ է կարգավորել երկխոսության եւ բանակցությունների ճանապարհով, կարծում է Վրաստանի նախագահը:
«Անհրաժեշտ է նաեւ նշել, որ Վրաստանի համար չափազանց կարեւոր է, որ հակամարտությունը (Լեռնային Ղարաբաղի – խմբ.) չտեղափոխվի Վրաստանի տարածք, իսկ հայերն ու ադրբեջանցիները խաղաղ ապրեն»,- հայտարարել է Սալոմե Զուրաբիշվիլին: Ընդ որում՝ նա կարեւորել է հայ բնակչության կողմից վրացերեն սովորելու մակարդակի բարձրացումը, որպեսզի լինեն երկրի զարգացման լիարժեք մասնակիցներ:
Երկու երկրների նախագահները քննարկել են տարածաշրջանի ներուժը, խոսել Սալոմե Զրուաբիշվիլիի ԵՄ այցի եւ ԵՄ-ի վերաբերյալ Վրաստանի ծրագրերի մասին: «Կարեւորագույն փուլ կլինի Բաթումիի համաժողովը, որտեղ ներկայացվելու է ԵՄ-ի հետ հարաբերությունների նոր փուլի տեսլականը, որը կհանգեցնի վերջնական ինտեգրման»,- նշել է Զուրաբիշվիլին: Հայաստանի դիրքորոշումը լսելու համար համաժողովին հրավիրվել է նախագահ Արմեն Սարգսյանը:
Համագործակցության առաջնային ուղղությունների թվում Սալոմե Զուրաբիշվիլին նշել է տուրիզմը, նոր տեխնոլոգիաները, էներգետիկան, դեպի Հայաստան տրանսպորտային ենթակառուցվածքները: «Մեծ ծրագրեր կան ինչպես ԵՄ-ի հետ, այնպես էլ առանց ԵՄ-ի: Ժամանակն է, որ մեր երկրներն ավարտեն սահմանների ապալիմիտավորումը: Բարեկամների միջեւ սահմանների ապալիմիտավորման գործընթացն այսքան երկար չպետք է տեւի»,- նշել է Զուրաբիշվիլին՝ հիշեցնելով, որ ԱԳ նախարար եղած տարիներին նորմատիվ բազան ավարտվել էր:
«Մենք մեծ ապագա ունենք եւ լավատես ենք: Մտադիր ենք շատ հարցերով քննարկումները շարունակել եւ հայտարարություններով չսահմանափակվել»,- հավաստիացրել է Սալոմե Զուրաբիշվիլին:
