Ես երբեք ՄԻԵԴ-ի վրա հույս չեմ դրել, ինչի՞ս է պետք 7-8 տարի հետո պիտի որոշում կայացնեն: Այս մասին, այսօր՝ մարտի 14-ին, լրագրողների հետ զրույցում նշեց ՀՀ երկրորդ նախագահ Ռոբերտ Քոչարյանի պաշտպաններից Ռուբեն Սահակյանը՝ պատասխանելով հարցին, թե որ փուլում են Քոչարյանի գործով փաստաբանների ՄԻԵԴ ուղարկված բողոքները:
«Գագիկ Ջհանգիրյաանը ե՞րբ էր դատապարտվել, 2008-2009 թվականներին, այսօր 2019 թվականն է ու դեռ վերջնական որոշում չկա»,-ասաց նա:
Ռուբեն Սահակյանը նշեց, որ այսօր Քոչարյանի կալանքի հարցով դատական նիստում խոսել են այն ամենի մասին, ինչ պատրաստվում էին խոսել՝ կապված հիմնավոր կասկածի հետ, անձեռնմխելիության խնդրի հետ, անվտանգության հարցերի հետ, առաջադրված մեղադրանքի հետ, ներկայացված միջնորդության հետ, որը վերաբերում է կալանքի ժամկետը երկարացնելուն:
«Ասվում է, որ բանակն իրավունք չունի խառնվելու ներքին հարցերին, անվտանգության հարցերը միայն սահմաններին պետք է լինի: Դա կատարյալ անգրագիտություն է: Եթե այդպիսի բան են ասում, թող հզում անեն օրենքներին: Մենք հղում ենք անում օրենքներին եւ ասում ենք, որ դա նաեւ ներքին հարց է: Մենք նաեւ հղում ենք անում միջազգային փաստաթղթերի»,-ասաց նա:
