ՀՀ նախագահ Արմեն Սարգսյանն այսօր շնորհավորական ուղերձ է հղել Վրաստանի նախագահ տիկին Սալոմե Զուրաբիշվիլիին՝ ծննդյան տոնի առթիվ:
«Ձեր պաշտոնական այցը Հայաստան և դրա շրջանակներում մեր հանդիպումները բավականին արդյունավետ էին և մեկ անգամ ևս հնարավորություն ընձեռեցին ընդգծել հայ և վրացի ժողովուրդների միջև առկա ավանդական բարեկամական հարաբերություններն ու անդրադառնալ մեր երկրների համագործակցության հեռանկարներին»,- նշել է նախագահ Սարգսյանը:
Նա համոզմունք է հայտնել, որ Հայաստանի և Վրաստանի միջև փոխադարձ հարգանքի և վստահության վրա հիմնված փոխգործակցությունը հետագայում ավելի կխորանա:
Արմեն Սարգսյանը Սալոմե Զուրաբիշվիլիին մաղթել է քաջառողջություն, բարեկեցություն և նորանոր հաջողություններ:
Հիշեցնենք, որ օրերս Վրաստանի նախագահը Բաքու այցելության ժամանակ Իլհամ Ալիեւի հետ հանդիպման ժամանակ նշել էր, որ Վրաստանն ու Ադրբեջանը «վերջին տարիներին վերապրել նմանատիպ ողբերգություններ` այն, ինչը կոչվում է` օկուպացված տարածք, երբ երկրի տարածքային ամբողջականությունը դեռ չի վերականգնվել»:
Դրանից օրեր անց Զուրաբիշվիլին այցելել է նաեւ Հայաստան, որտեղ ոչ միայն չի փորձել մեղմել իր խոսքը, այլեւ նոր մեղադրանք է ներկայացրել. Ըստ Վրաստանի նախագահի մամուլի ծառայության, Սալոմե Զուրաբիշվիլին հայտարարել է, որ Վրաստանի համար կարևոր է, որպեսզի իր տարածքային ամբողջականությունը և ինքնիշխանությունը ճանաչվեն ոչ միայն խոսքերով, նա դատապարտել է Արցախի Հանրապետությունից պատվիրակությունների այցերն Աբխազիա և Հարավային Օսիա: