Ճապոնիայի իշխանությունները բողոք են ներկայացրել Հարավային Կորեային՝ կապված Սեուլի նախատեսած ծովայի ընդերքի հետազոտությունների հետ՝ վիճելի Տակեսիմա կղզների տարածքում (Տոկտոյի հարավկորեերեն անվանումը), մամուլի ասուլիսում ասել է Ճապոնիայի կառավարության գլխավոր քարտուղար Յոսիհիդե Սուգան, տեղեկացնում է ՌԻԱ «Նովոստի»-ն։
«Հարավային Կորեայի Ազգային օվկիանոսագիտական հետազոտական ինստիտուտի տեղեկատվությամբ՝ հայտարարվել է մրցույթ Ճապոնիայի տարածքային ջրերում, Տակեսիմա (Տոկտո) կղզիների շրջանում հետազոտությունների անցկացման համար։ Դա անընդունելի է Տակեսիմայի (Տոկտո) տարածքային պատկանելության ճապոնական դիրքորոշումից ելնելով։ Տեղեկատվության ստուգումից հետո մենք վճռական բողոք հղեցինք դիվանագիտական խողովակներով եւ պահանջեցինք դադարեցնել այդ ծրագրերը»,- ընդգծել է Սուգան։
Տոկտո կղզեխումբը (ճապոնական անվանումը՝ Տակեսիմա) գտնվում է Ճապոնիայի եւ Հարավային Կորեայի միջեւ Ճապոնական ծովում։ Երկրորդ համաշխարհային պատերազմից հետո այդ կղզիները դարձան կորեական։ Ճապոնիան սա անվանում է «ապօրինի զավթում» եւ կղզիները համարում է իր տարածքի մաս եւ վարչականորեն դրանք ներառում է Սիմանե պրեֆեկտուրայի կազմում։ Կղզիները հայտնի են նաեւ որպես Լիանկուր ժայռեր։ Ճապոնիան Կորեային առաջարկում է կղզիների հարցը ներկայացնել ՄԱԿ Միջազգային դատարան։ Հարավային Կորեան կարծում է, որ Տոկտո կղզիների շուրջ վեճ չկա, քանի որ դրանք կորեական տարածք են պատմականորեն, աշխարհագրորեն եւ իրավաբանորեն։
