Սաուդյան Արաբիան դատապարտել է Գոլանի բարձունքների վրա Իսրայելի ինքնիշխանությունը ճանաչելու մասին ԱՄՆ վարչակազմի որոշումը: Այս մասին հայտնել է Սաուդյան մամուլի գործակալությունը, որը կառավարական լրատվական գործակալություն է:
«Սաուդյան Արաբիայի թագավորությունը ամբողջությամբ մերժում է եւ դատապարտում ամերիկյան վարչակազմի հայտարարությունը օկուպացված սիրիական Գոլանի բարձունքների վրա Իսրայելի ինքնիշխանության ճանաչման մասին»,- նշված է հայտարարության մեջ: ԱՄՆ գործողությունները «ՄԱԿ կանոնադրության եւ միջազգային իրավունքի սկզբունքների ակնհայտ խախտում են», ընդգծել է գործակալությունը: Սպիտակ տան հայտարարությունը «բացասական ազդեցություն կունենա Մերձավոր Արեւելքում խաղաղության գործընթացի, տարածաշրջանի անվտանգության եւ կայունության վրա», կարծում է Էր Ռիադը:
Թուրքիայի ԱԳ նախարար Մեւլութ Չավուշօղլուն հայտարարել է, որ ԱՄՆ-ն Գոլանի բարձունքների վրա Իսրայելի ինքնիշխանությունը ճանաչելով՝ հերթական անգամ խախտել է միջազգային իրավունքը, հայտնում է Անատոլիական գործակալությունը:
«Այս որոշումն օրինականացնում է Իսրայելի կողմից Գոլանի բարձունքների բռնազավթումը»,- նշել է թուրք նախարարը:
Հռչակագիրը ստորագրելու արարողությունը տեղի է ունեցել երկուշաբթի Սպիտակ տանը Իսրայելի վարչապետ Բենիամին Նեթանյահուի հետ ԱՄՆ նախագահ Դոնալդ Թրամփի բանակցությունների շրջանակում: Ավելի վաղ այսպիսի միակողմանի գործողությունների դեմ արտահայտվել էին ոչ միայն արաբական ու իսլամական աշխարհի երկրները, այլեւ Ռուսաստանը, ինչպես նաեւ եվրոպական առանցքային երկրները՝ ներառյալ Գերմանիան եւ Ֆրանսիան:
Մինչեւ 1967 թվականը Գոլանի բարձունքները համարվել են Սիրիայի մասը: Բարձունքների երկու երրորդը Իսրայելը գրավել է 1967 թվականի հունիսի սկզբին Վեցօրյա պատերազմի ժամանակ: 1981 թվականի դեկտեմբերին Իսրայելի խորհրդարանը օրենք է ընդունել Գոլանի բարձունքների վրա իսրայելական իրավազորության տարածման մասին:
ՄԱԿ ԱԽ-ն այս որոշումը չի ընդունել: ՄԱԿ Գլխավոր վեհաժողովը բազմիցս բռնազավթումն ապօրինի է որակել եւ Իսրայելին կոչ արել Գոլանը վերադարձնել սիրիացիներին:
Թրամփի որոշումը մեկնաբանելիս ՌԴ ԱԳՆ-ում հայտարարել են, որ նման որոշումը կարող է բերել Մերձավոր Արեւելքում լարվածության նոր գալարի:
ՌԴ ԱԳՆ-ն Գոլանի բարձունքների վերաբերյալ ԱՄՆ որոշումն անվանել է Մերձավոր արեւելքի ապակայունացմանը տանող քայլ: