«Թավշյա հեղափոխությունից» հետո կառավարությանը հաջողվել է ոչ միայն պահպանել կայունությունը, այլեւ խուսափել ռեցեսիվ տնտեսական գործընթացներից, ինչպես նաեւ տնտեսական աճ ապահովել։ Այս մասին մարտի 28-ին Ազգային ժողովում կառավարության 2018 թվականի գործունեության մասին հաշվետվության քննարկման շրջանակում, պատասխանելով «Լուսավոր Հայաստան» խմբակցության պատգամավոր Արկադի Խաչատրյանի՝ բարձր տեխնոլոգիաների եւ գյուղատնտեսության մասին հարցին, ասել է վարչապետ Նիկոլ Փաշինյանը։
Փաշինյանի խոսքով՝ կառավարությանը հաջողվել է նաեւ ապահովել ամենաթափանցիկ եւ դեմոկրատական ընտրությունները Հայաստանի պատմության մեջ, որոնք այդպիսին են ճանաչվել միջազգային հանրության կողմից։ «Այո, այդ շրջանում մենք ունեցել ենք անկում գյուղատնտեսության ոլորտում։ Դա կապված է եղել վնասատուների, ոչ ճիշտ պլանավորման, ինչպես նաեւ ստվերային այգիների հետ, որոնք մեզ հաջողվել է հայտնաբերել»,- ասել է վարչապետը։
Խոսելով բարձր տեխնոլոգիաների մասին՝ կառավարության ղեկավարը նշեց, որ իշխանությունները շարունակում են Երեւանում հոկտեմբերին նախատեսված Միջազգային տեղեկատվական կոնգրեսի պատրաստությունը, ինչի համար պետբյուջեից ծախսվել է մոտ 1 մլրդ դրամ։ «Ինժեներական քաղաքի կառուցումը առաջնահերթ խնդիր է, որը պետք է իրականացվի»,- հավելել է Նիկոլ Փաշինյանը։
Ընդ որում՝ նա հավաստիացրել է, որ եկամտահարկի առաջարկվող հավասարեցումը, առաջին հերթին, ուղղված է ՏՏ ոլորտի զարգացմանը, քանի որ հենց այստեղ է կառավարությունը նախատեսում բացել նոր աշխատատեղեր՝ բարձր եւ արժանապատվ աշխատավարձերով։