ԱՄՆ վարչակազմը ստում է իր զորքերը Սիրիայից դուրս բերելու մասին։ Այս մասին հայտարարել է Սիրիայի ԱԳՆ ղեկավար Վալիդ ալ Մուալեմը Վենեսուելայի պաշտոնակցի՝ Խորխե Արեասայի հետ Դամասկոսում համատեղ մամուլի ասուլիսի ժամանակ, տեղեկացնում է ՍԱՆԱ պետական տեղեկատվական գործակալությունը։
Նրա խոսքով՝ ամերիկյան վարչակազմը ստում է իր ուժերը դուրս բերելու հաշվով, որոնք Սիրիայում են գտնվում ապօրինաբար։ Նա նշել է, որ պատերազմն ահաբեկչության դեմ ավարտված չէ, «Սիրիայի դեմ դավադրությունը շարունակվում է ռազմական ագրեսիայի եւ տնտեսական շրջափակման միջոցով՝ Իսրայելի օգտին ճգնաժամը ձգձգելու նպատակով»։
Այս տարեսկզբին ԱՄՆ նախագահ Դոնալդ Թրամփը հայտարարել էր ամերիկյան զինվորականներին Սիրիայից դուրս բերելու մասին՝ «Իսլամական պետության» դեմ տարած լիակատար հաղթանակից հետո։
Փետրվարին ԱՄՆ Կենտրոնական հրամանատարության ղեկավար, գեներալ Ջոզեֆ Վոթելն ասել էր, որ ցամաքային զորքերը կսկսեն դուրս բերել մի քանի շաբաթ հետո։
