Հայրենական արտադրողներից մեկի՝ «Արարատցեմենտ» ընկերության կողմից ցեմենտի գների նվազեցումը բարի կամքի ժեստ է: Այս մասին ապրիլի 19-ին ԱԺ նիստում «Պետական տուրքի մասին» եւ «Գործունեության իրականացումն իրազեկելու մասին» օրենքներում լրացումներ կատարելու մասին օրինագծերի փաթեթի քննարկման ժամանակ ասաց «Բարգավաճ Հայաստան» կուսակցության խորհրդարանական խմբակցության քարտուղար Արման Աբովյանը:
Նրա խոսքով՝ դրա հիմնական ուղերձն էր տնտեսական հեղափոխության մասին իշխանությունների գաղափարին աջակցելու ցանկությունը: «Մենք հրաշալի հասկանում ենք, որ ցեմենտը, ըստ էության, շինարարություն է, իսկ շինարարությունը մուլտիպլիկատիվ էֆեկտ ունի»,- պարզաբանեց Աբովյանը:
Պատգամավորը, միաժամանակ, նշեց, որ եթե ցեմենտի հիմնական բաղադրիչ կլինկերն արտադրվի Հայաստանի սահմաններից դուրս, իսկ դրանից հետո երկրում կատարվի միայն դրա կապոցավորումն ու փաթեթավորումը, ապա հայկական աշխատաշուկայում քաղաքացիները կսկսեն աշխատատեղեր կորցնել: Արման Աբովյանի կարծիքով՝ դրա փոխարեն անհրաժեշտ է խրախուսել տեղական արտադրողներին:
