Անդրեյ Մանդելշտամը Հայոց ցեղասպանությունը նկարագրել է ավելի շուտ, քան հայտնվել է այդ եզրույթը։ Այս մասին Էջմիածնում Անդրեյ Մանդելշտամի 150 ամյակին նվիրված կլոր սեղանի ժամանակ ասել է ԳԱԱ Արեւելագիտության ինստիտուտի տնօրեն Ռուբեն Սաֆրաստյանը։
Նրա խոսքերով, Մանդելշտամը կանխագուշակել է, որ իշխանության եկած երիտթուրքերի քաղաքականությունը կարող է հանգեցնել Օսմանյան կայսրությունում ազգային փոքրամասնությունների, այդ թվում հայերի համար, սպառնալիքի։ «Կարեւորն այն է, որ Մանդելշտամը նշել է, որ Հայերի ցեղասպանությունը կազմակերպվել է երկրի բարձրագույն ղեկավարության կողմից»,- ասել է նա։ Փորձագետը հավելել է, որ ռուս դիվանագետը արդեն այն ժամանակ տեսել է «Մեծն Թուրանի» գաղափարի հնարավոր իրականացման սպառնալիքը։
Նշենք, որ ապրիլի 23-ին Էջմիածնում անցկացվել է կլոր սեղան՝ նվիրված ռուս դիվանագետ Անդրեյ Մանդելշտամի 150 ամյակին։ Միջոցառմանը նաեւ մասնակցել են Հայաստանում ՌԴ արտակարգ եւ լիազոր դեսպան Սերգեյ Կոպիրկինը, գիտնականներ, հասարակական գործիչներ։