Հայոց ցեղասպանության միջազգային ճանաչումը շարունակական պրոցես է, այդ ուղղությամբ իրականացվում են բոլոր քայլերը: Այս մասին, այսօր՝ ապրիլի 24-ին, Ծիծեռնակաբերդի հուշահամալիրում լրագրողների հետ զրույցում նշեց Արցախի ԱԳ նախկին նախարար Կարեն Միրզոյանը՝ հավելելով, որ այդ ուղղությամբ քայլերը դրական է գնահատում:
«Դա մի գործընթաց է, որը կարեւոր է ոչ միայն մեզ համար, այլեւ այն ունի գլոբալ նշանակություն: Հայոց ցեղասպանության ճանաչումն ու դատապարտումը թույլ է տալիս խուսափելու հետագայում նման ողբերգության կրկնությունից»,-ասաց նա:
Դիտարկմանը, որ վերջերս քննադատվում է, որ ՀՀ նոր իշխանությունները Հայոց ցեղասպանության միջազգային ճանաչման հարցում բավարար ջանքեր չեն գործադրում, Կարեն Միրզոյանն ասաց. «Յուրաքանչյուր հարցի վերաբերյալ պետք է խոսեն լիազորված մարդիկ: Այսօրվա իմ կարգավիճակով, չառնչվելով այդ հարցին, կարծում եմ՝ ճիշտ չի լինի հանդես գամ գնահատականներով»: