Եթե ուզում ենք միջազգային ճանաչում ունենա Հայոց ցեղասպանությունը, ապա պետք է հզորացնենք տնտեսությունն ու զարգացնենք մշակույթը: Այս մասին այսօր՝ ապրիլի 24-ին Ծիծեռնակաբերդի հուշահամալիրում լրագրողների հետ զրույցում նշեց Լիոնի քաղաքապետի առաջին տեղակալ Ժորժ Կեպենեկյան, նշելով՝ որ առաջին անգամ է ապրիլի 24-ին գտնվում Հայաստանում. «45 տարի, միշտ այս օրը Լիոնում պայքարել եմ Ցեղասպանության ճանաչման համար, բայց այսօր եկել եմ Հայաստան, եւ շատ հուզված եմ»,- ասաց նա:
Ժորժ Կեպենեկյանի խոսքով, եթե ուզում ենք՝ Թուրքիան ճանաչի Հայոց Ցեղասպանությունը, ապա պետք է շարունակենք պայքարը միջազգային ճանաչման համար: Ըստ նրա՝ հարցն այլ լուծում չունի, Թուրքիան պետք է ընդունի Ցեղասպանությունը:
«Տարբեր ճանապարհներ կան ընդունելու, պետք է նոր մոտեցումներ ստեղծենք: Կարեւոր է այլ երկրների աջակցությունը, քանի որ մեր թշնամիներն ունեն նյութական եւ տնտեսական մեծ ուժեր: Մենք էլ ունենք խելք, եւ այսօր նոր սերունդը պետք է հետ չնայի, այլ նայի դեպի ապագա»,- ասաց Լիոնի քաղաքապետը, եւ ավելացրեց, որ պետք է ստեղծվեն հզոր համալսարաններ, եւ երազելու փոխարեն պետք ստեղծված վիճակը փոխեն:
Լիոնի քաղաքապետի առաջին տեղակալը նշեց, որ պետք չի հույսեր փայփայել, թե Թուրքիայի այսօրվա իշխանությունները կճանաչեն Հայոց ցեղասպանությունը. «Պետք չէ պարապ հույսեր ունենալ, պետք է քայլեր անենք, որ փոխենք այսօրվա վիճակը»: Անդրադառնալով Արցախի հարցին՝ նա ասաց, որ հայ ժողովուրդը որտեղ էլ լինի, միեւնույն է մնում է հայ: