Կանանց ակտիվությունը քաղաքականության, տնտնտեսության մեջ, հանրային կյանքում, պետական կառավարման համակարգում որեւէ կերպ չի հակասում ավանդական ընտանիքի մասին մեր պատկերացումներին: Այս մասին, այսօր՝ ապրիլի 26-ին, Կանանց ձեռներեցության միջազգային համաժողովում իր ելույթում նշեց ՀՀ վարչպետ Նիկոլ Փաշինյանը՝ հավելելով, որ դա իր համոզմունքն է:
«Մենք այսօր ունենք այդպիսի շատ տեսանելի օրինակներ, որոնք հիմնավորում են մեր այդ դիրքորոշումը: Ուզում եմ կոչ անել բոլոր կանանց, որ անեն իրենց քայլը նաեւ տնտեսական հեղափոխության գործում: Նաեւ ձեռներեցության մեջ կանայք կարող են ավելի արդյունավետ լինել, ավելի հաշվենկատ, ավելի հավասարակշռված, ունենան ավելի հաշվարկված լինելու ընդունակություն: Ես համոզված եմ, որ հայ կնոջ պատասխանատվության զգացումը մի փոքր ավելին է, քան մենք սովորաբար տեսնում ենք տղամարդկանց շրջանում:
Ես հավատում եմ, որ վիճակագրորեն կանայք ավելի քիչ են հակված կոռուպցիային եւ կոռուցպայի մեջ ներքաշվելուն, քան դա կարող է լինել տղամարդկանց շրջանում: Դա իմ համոզմունքն է: Ես համոզված եմ, որ կանանց ներգրավվածությունը գնալով շատանալու է»,-հայտարարեց Փաշինյանը:
Նշենք, որ Կանանց ձեռներեցության միջազգային համաժողովը Հայաստանում անցկացվում է առաջին անգամ: Համաժողովին մասնակցում են եւ ելույթներով հանդես եկան Տնտեսական զարգացման եւ ներդրումների նախարար Տիգրան Խաչատրյանը, ՀՀ -ում ԱՄՆ արտակարգ եւ լիազոր դեսպան Լին Թրեյսին, ՀՀ-ում Մեծ Բրիտանիայի արտակարգ եւ լիազոր դեսպան Ջուդիթ Մարգրետ Ֆարնուորթը, ՀՀ-ում Ֆրանսիայի արտակարգ եւ լիազոր դեսպան Ժոնաթան Լաքոտը, Կին ձեռներեցների համաշխարհային ասոցիացիայի FCEM-հայաստանյան նախագահ, Հայաստանի երիտասարդ կանանց ասոցիացիայի եւ ՀՀ Կին ձեռներեցների ցանցի նախագահ Լիլիթ Ասատրյան, Կին ձեռներեցների համաշխարհային ասոցիացիայի (FCEM) նախագահ Մարի Քրիստին Օղլին:
