Իրանի նավթի նախարար Բիժան Նամդար Զանհանեն կարծում է, որ Սաուդյան Արաբիան եւ ԱՄԷ-ն չափազանցնում են իրենց նավթային հատվածի հնարավորությունները՝ խոստանալով փոխհատուցել շուկայում իրանական նավթի պակասը, փոխանցում է IRNA գործակալությունը:
«Որքան հասկանում եմ, այս երկրները չափազանցնում են իրենց նավթային հատվածի հնարավորությունները: Սաուդյան Արաբիայի եւ ԱՄԷ-ի խոստումները ինչպե՞ս կարող են փոխհատուցել համաշխարհային շուկայում իրանական նավթի վակուումը»,- ասել է Զանհանեն: Նա հավելել է, որ ԱՄՆ հակաիրանական պատժամիջոցները, որոնք հարվածում են նավթային ոլորտին, «բլեֆ չեն, այլ Իրանի հանդեպ թշնամանքի կտրուկ դրսեւորում»:
Իրանի նախագահի աշխատակազմի ղեկավար Մահմուդ Վաեզին իր հերթին Սաուդյան Արաբիայի եւ ԱՄԷ-ի՝ իրանական նավթը փոխարինելու պատրաստակամությունն անվանել է «Իրանի ժողովրդի դեմ ագրեսիայի գործողություն»: «Այս երկու երկրները չեն կարող չհասկանալ, որ Թրամփը կարող է իր թշնամական քաղաքականությունը վարել եւս 1-2 տարի: Իսկ մենք տարածաշրջանում իրենց մշտական հարեւաններն ենք»,- Shana գործակալության փոխանցմամբ ասել է Վաեզին: