Հայաստանում լրագրողների պրոֆեսիոնալիզմը բարձրացնելու լուրջ խնդիր կա: Այս մասին Մամուլի ազատության միջազգային օրվա կապակցությամբ իր շնորհավորական ուղերձում նշել է ՀՀ վարչապետի տիկին Աննա Հակոբյանը:
Նա, մասնավորապես, նշել է.
«Շնորհավորում եմ ձեզ մասնագիտական օրվա կապակցությամբ: Այսօր Մամուլի ազատության միջազգային օրն է, ու Հայաստանն այն նշում է դրական դինամիկա արձանագրելով: Ինչպես հայտնի է, «Լրագրողներ առանց սահմանների» միջազգային կազմակերպության 2019 թվականի «Մամուլի ազատության ինդեքսում» Հայաստանը 19 կետով առաջընթաց է գրանցել 79-րդ տեղից զբաղեցնելով 61-րդ տեղը:
Մեր երկրում, ինչպես ամբողջ աշխարհում, լրագրողի աշխատանքը ամենաանշնորհակալներից մեկն է. լրագրողները գտնվում են մշտական սպառնալիքի տակ, մասնագիտական պարտականությունները կատարելիս մշտապես հանդիպում են խոչընդոտների, լրագրողների խոշտանգումները, հետապնդումներն ու սպանությունները սովորական երեւույթ են աշխարհի շատ երկրներում: Սա նշանակում է, որ միայն ամենաքաջ եւ այս մասնագիտությունն իսկապես արժեւորող անհատներն են որոշում լրագրող դառնալ՝ քաջ գիտակցելով, որ ճանապարհը հարթ չի լինելու:
Այսպես է ամբողջ աշխարհում եւ այսպես է Հայաստանում: ԵՎ մեր հասարակությունը պետք է գիտակցի այս փաստը, գնահատի լրագրողի աշխատանքը, քաջալերի եւ աջակցի նրան:
Այսօր, Մամուլի ազատության միջազգային օրվա կապակցությամբ չեմ կարող նաեւ չբարձրացնել լրագրողների մասնագիտական կարողություններն ամեն օր ու ամեն ժամ կատարելագործելու կարեւորության մասին: Մենք պետք է կարողանանք ուղիղ նայել խնդիրներին եւ ընդունենք, որ Հայաստանում լրագրողների պրոֆեսիոնալիզմը բարձրացնելու լուրջ խնդիր կա:
Մենք պետք է հասկանանք, որ Ազատ մամուլը զարգացած եւ բարեկեցիկ երկիր ունենալու թիվ մեկ գրավականն է: Բոլոր միջազգային զեկույցների համաձայն ամենաազատ մամուլ ունեցող երկրներն են Շվեդիան, Նորվեգիան, Ֆինլանդիան, Շվեյցարիան, Կանադան: Այսինքն, աշխարհի ամենահարուստ եւ բարեկեցիկ երկրները: Եվ եթե մենք ուզում ենք տեղ գրավել այս շարքում, պետք է փոխենք մեր վերաբերմունքը մամուլի եւ լրագրողների նկատմամբ, պետք է սիրենք եւ հարգենք լրագրողներին, թույլ տանք նրանց սովորել եւ կրթվել, լինել ազատ, մտածել քննադատաբար, գործել անաչառ եւ անկաշկանդ:
Շնորհավո´ր Մամուլի ազատության միջազգային օրն ու կեցցե՜ Ազատ մամուլը»:
