Ժողովրդին եւ բանակը կողոպտած մարդիկ ղարաբաղյան հարցը լուծելու բարոյական իրավունք չունեն: Մայիսի 8-ին մեծ մամուլի ասուլիսի ժամանակ այս մասին ասաց վարչապետ Նիկոլ Փաշինյանը:
Ի պատասխան հարցին՝ Ստեփանակերտում կշփվի՞ Սերժ Սարգսյանի հետ, որտեղ այդ օրերին լինելու են, եւ ինչպե՞ս է մտադիր ժողովրդին հայտնել Լեռնային Ղարաբաղի հիմնախնդրով բանակցությունների արդյունքների մասին, Նիկոլ Փաշինյանը նշեց. «Դուք կարծում եք, որ ես Սերժ Սարգսյանի հետ կշփվե՞մ: Ահա, գրում են, որ մեկնում է Արցախ: Եվ Նիկոլ Փաշինյանը՝ նույնպես: Սերժ Սարգսյանն ու ես Հայաստանում ենք, Երեւանում, նույնիսկ ինչ-որ ժամանակ հարեւանությամբ բնակվել ենք կառավարական ամառանոցում: Եվ ի՞նչ: Երբ ինձ հարկավոր լինի Սերժ Սարգսյանի հետ խոսել, ես կխոսեմ: Այսինքն՝ այնպիսի տպավորություն է, թե որեւէ մեկը որոշել է, որ ես պետք է նրա հետ հանդիպեմ: Սերժ Սարգսյանը չի կարող որոշել, իսկ ես կարող եմ որոշել՝ հանդիպել թե ոչ: Պա՞րզ է: Կարծես թե՝ ոչ: Կան շրջանակներ, որոնց համար պարզ չէ: Ես չեմ պատրաստվում նրանց հետ շփվել: Եթե անհրաժեշտ լինի, կհանդիպեմ եւ ժողովրդին կհայտնեմ»:
«Նաեւ ասում ու զարմանում են, որ ժողովուրդը պետք է որոշի ղարաբաղյան հարցը: Նախկինում ծիծաղում էին, որ ժողովուրդը կարող է վարչապետ ընտրել: Հանրապետականները եւ նրանց մերձավորները ծիծաղում էին: Բայց ահա եւ ընտրեցին: Չէ՞ որ ստացվեց: Եվ դարձյալ զարմանում են՝ ժողովո՞ւրդը պետք է որոշի Ղարաբաղի հարցը: Իսկ ո՞վ եք դուք, մի քանի կոռուպցիոներներ: Ժողովրդին կողոպտելով՝ լուծելու եք Ղարաբաղի ճակատագի՞րը: Ձեր տները իտալիաներում են եւ բադեն-բադեններում, մոտակայքում է մասնավոր օդանավը: Իսկ ովքե՞ր եք դուք: Իհարկե, ժողովուրդը պետք է որոշի: Հայաստանում ամեն ինչ որոշելու է ժողովուրդը: Օրենքով հաստատված կարգով»,- շեշտեց Փաշինյանը:
Նրա խոսքով՝ եթե բանակցությունների արդյունքներով այնպիսի որոշում լինի, որն արժանի համարի ժողովրդին ներկայացնել, դա կանի: «Դա կարող է լինել հանրահավաք, մամուլի ասուլիս, տեսաուղերձ: Եվ ասեմ՝ կա այսպիսի տարբերակ: Դուք թույլ տալի՞ս եք այդ շրջանակում բանակցություններ վարել: Ամենամեծ հարցն այն է, թե մենք ինչ ենք ուզում: Եկեք հստակ ձեւակերպենք, թե ինչ ենք ուզում: Եվ կառավարությանն ասենք՝ ահա սա է քո խնդիրը: Թե չէ գնում ենք բանակցությունների, մեղադրում են, որ վաճառել ենք: Էդ դո՛ւք եք վաճառել: Ո՞վ բարոյական իրավունք ունի ինձ մեղադրելու: Մեղադրում են երկիրը կողոպտած մարդիկ: Բայց ո՞վ է նրանց նման բարոյական իրավունք տվել: Բայց ո՞վ են նրանք ընդհանրապես: Սերմ գողացող մկներ, բանակը կողոպտածներ, զինվորների հաշվին ճարպակալածներ: Նրանք հարցը լուծելու բարոյական իրավունք չունեն, չնայած մեդալներին ու ուսադիրներին: Ձեր տեղը կորոշեն քննությունն ու դատը»,- հայտարարեց Նիկոլ Փաշինյանը: