![](img/news/05/11/58/default.jpg)
Հայաստանի առողջապահության նախարարությունը սկսել է ստուգումներ անցկացնել մարզային հիվանդանոցներում: Նախարարության հատուկ հաձնախումբն այս օրերին ավարտել է շրջագայությունը Երեւանի հիվանդանոցներում ու անցել մարզերին: Շիրակի մարզում հանձնաժողովը եղել է հիվանդանոցներում: Ստուգումներն անցկացվել են գիշերային ժամերին եւ սանիտարական խնդիրներ են արձանագրվել: Նկատողություններ են ստացել բուժքույրերը, նրանց հորդորել են զգոն լինել ու լավ աշխատել:
«Ընդհամենը այն,ինչ տեսել են, եղել են ներակրիչներ, որոնք առանց օգտագործելու հաշվել ու թողել ենք սեղանի վրա, որպեսզի մյուս հերթի քույրերն ընդունեն: Դրանք նոր են եղել , առանց օգտագործման, ասում են սանիտարական լուրջ խնդիր է ու նկատողություն են արել»,- NEWS.am-ին հայտնել են Գյումրիի «Սամարիթեր» հիվանդանոցի հերթապահ բուժքույրերը:
Շիրակի մարզպետարանի առողջապահության վարչության պետ Հոնհաննես Հովհաննիսյանն էլ ասում է, որ իրեն հատկապես դուր է եկել գիշերային ստուգումների ոճը: Ինքն էլ հետեւելու է նախարարական հանձնախմբին ու սկսելու է գիշերային ստուգումները մարզի բուժհաստատություններում: «Ստուգել են, թերություններ են հայտնաբերել ու պատժել են»,- նշված ձեռնարկի կապակցությամբ կարծիք է հայտնել Հովհաննես Հովհաննիսյանը:
Իսկ բուժաշխատողներն այն կարծիքին են, որ իրենց պատժում են այն բանի համար, որ սկսել են բողոքել ցածր աշխատավարձից: «Խոստանում էին, որ 2 անգամ բարձր աշխատավարձ են տալու, հիմա սկսել են ճիպոտահարել, որ աշխատանքներիս վրա դողանք, որ փող չուզենք»,- ասում են նրանք: