Իրանի Զինված ուժերի Գլխավոր շտաբը աջակցություն է հայտնել միջուկային համաձայնագրի մի մասի կատարումը դադարեցնելու վերջերս ընդունված որոշմանը՝ խոստանալով թշնամիների հնարավոր ցանկացած գործողությանը վճռական պատասխան տալ, փոխանցում է Mehr-ը:
Գլխավոր շտաբը մատնացույց է արել համաձայնագիրը ստորագրած մնացած մասնակիցների անբավարար հանձնառությունը՝ վճռական աջակցություն հայտնելով երկրի նախագահի վերջերս ընդունած որոշմանը:
Ավելի վաղ Իրանի նախագահ Հասան Ռոհանին հայտարարել էր, որ Իրանը կդադարեցնի այս գործարքով իր մի քանի պարտավորությունների կատարումը: Իրանն այլեւս չի հետեւի հարստացված ուրանի եւ ծանր ջրի պահպանման վրա համաձայնագրով դրված սահմանափակումներին: Միջուկային գործարքի մնացյալ կողմերին 60 օր է տրվել համաձայնագրի շրջանակում ստանձնած իրենց պարտավորությունների կատարման համար, հատկապես կապված բանկային եւ նավթային հատվածների հետ: