Huawei-ի ղեկավարությունը դեմ է, որպեսզի Պեկինը միջոցներ ձեռնարկի Apple-ի դեմ՝ ի պատասխան չինական այդ ընկերությունը սեւ ցուցակ մտցնելու ԱՄՆ որոշման։ Այս մասին Bloomberg գործակալության հարցազրույցում ասել է Huawei-ի գլխավոր տնօրեն Ժեն Չժենֆեյը, տեղեկացնում է ՏԱՍՍ-ը։
«Նախ նման բան տեղի չի ունենա։ Երկրորդ, եթե նման բան տեղի ունենա, ապա ես առաջինը կարտահայտեմ իմ բողոքը»,- հավաստիացրել է նա։ «Apple-ը աշխարհում առաջատար ընկերություն է, առանց նրա չէր լինի բջջային ինտերնետը։ Եթե Apple-ը չլիներ, որպեսզի օգնի մեզ ցույց տալ ողջ աշխարհը, մենք չէինք տեսնի շրջակա աշխարհի գեղեցկությունը»,- ասել է Ժեն Չժենֆեյը։
Նա ամերիկյան ընկերությունն անվանել է իր ուսուցիչը։ «Այն մեր աչքերի առջեւ առաջ է ընթացել։ Ինչո՞ւ ընդդիմանամ ուսուցչիս։ Ես երբեք այդպես չեմ վարվի»,- խոստացել է չինական ընկերության տնօրենը։
Ժեն Չժենֆեյը խոստովանել է, որ ԱՄՆ գործողությունները հանգեցնում են Huawei-ի՝ մրցակիցներից հետ մնալուն 5G տեխնոլոգիաների ոլորտում։ «Հաստատ, մենք հետ կընկնենք, եթե մեր ինքնաթիռների թեւերին շատ անցքեր լինեն։ Եթե մենք դանդաղ թռչենք, իսկ մյուսները՝ արագ, նրանք մեզ արագ կհասնեն։ Բայց մենք կշարունակենք վերացնել այդ անցքերը, եւ երբ դրանք վերանան, նորից արագ կթռչենք»,- պատկերավոր բացատրել է Huawei-ի ղեկավարը։