Հայաստանի հաջողությունը նոր ստեղծվող աշխատատեղերն են, նոր ներդրումներն են տարատեսակ ծրագրերի մեջ: Այս մասին, այսօր՝ մայիսի 28-ին, Ապարանում լրագրողների հետ զրույցում նշեց ՀՀ փոխվարչապետ Տիգրան Ավինյանը՝ հավելելով, որ այդ ներդրումները կոնկրետ եւ չափելի են:
Լրագրողներից մեկը դիմելով փոխվարչապետին, ասաց, որ տեղեկություններ ունի, որ մի քանի ամիս առաջ Հոլանդիայից եկած ներդրող է եղել, որը առաջարկել է 90 միլիոն դոլարի ներդրումներ կատարել ավիացիայի ոլորտում, բացել ավիաընկերություն, փորձել է հանդիպել Ավինյանի հետ, բայց իր օգնական Տաթեւիկ Այդինյանը 2 ամիս շարունակ այդ ներդրողին չի ընդունել:
Այս առնչությամբ Տիգրան Ավինյանն ասաց. «Նախ պետք է հասկանանք՝ ինչու է ներդրողը ուզում ինձ հետ հանդիպել, եթե այդ հարցի պատասխանն ունենանք, ինձ թվում է՝ կարելի է շատ դեպքերում հասկանանք, որ ներդրողը իրականում այդքան էլ իրական ներդրող չէ:
Այսինքն եթե ուզում է փոխվարչապետի հետ հանդիպել, դա կարող է ունենալ մի քանի պատճառ: Ենթադրաբար, ինչ-որ արտոնություններ է պահանջում, որպեսզի այդ ներդրումը իրականանա, իսկ դա նշանակում է ավիացիոն շուկան խեղաթյուրել եւ ինչ-որ ընկերությանը ինչ-որ մի արտոնություն տալ, որը մի գուցե էլի քննարկելի է: Բայց ես չեմ կարծում, որ մենք մեկ ընկերությանը յուրահատուկ պայմաններ կարող ենք տալ, եւ մնացածին գործառույթները խաթարենք, եթե որեւէ մի քաղաքականություն մենք պետք է մշակենք դա պետք է լինի բոլորի համար, այսինքն հավասար արտոնյալ պայմաններ ապահովենք բոլորի համար:
Եվ նմանատիպ քաղաքականություն հիմա մշակվում է ավիացիայի կոմիտեում: Ընդհանուր առմամբ, իմ դռները երբեւէ փակ չեն եղել: Եթե իրական մարդիկ, իրական ներդրողներ ունեն որեւէ խնդիր իրենք միշտ կարող են դիմել իմ օգնականներին եւ հայտնվել իմ սենյակում: Այդ ներդրողի վերաբերյալ խնդրին տեղյակ չեմ: Ամենայն հավանականությամբ, դա եղել է մի հարց, որը որ իմ գրասենյակը նպատակահարմար չի համարել, որ այդ հանդիպումը կայանա: Իմ օգնականը ինձ չի տեղեկացրել այդ մասին, եւ դա նշանակում է, որ դրա կարիքն էլ չի եղել»:
