Samsung Electronics կորպորացիան Սեուլի իր գիտական կենտրոնում սկսել է վեցերորդ սերնդի նոր տեխնոլոգիաների հետազոտություններ, տեղեկացնում է ՏԱՍՍ-ը՝ հղում կատարելով Yonhap-ին։

«Մենք ընդլայնել ենք մեր մասնագետների թիմը, որոնք զբաղվում են հեռահաղորդակցային տեխնոլոգիաների մշակմամբ։ Նրանք սկսել են հետազոտությունները 6G-ի ոլորտում»,- ասել է կորպորացիայի ներկայացուցիչը, ում խոսքերը մեջբերում է Yonhap-ը։ Գործակալությունը նշում է, որ Samsung Electronics-ի հետազոտական խումբը 6G-ի տեխնոլոգիաներին զուգահեռ կստեղծի նաեւ արհեստական ինտելեկտ եւ ռոբոտներ։

Ապրիլի 4-ին Կորեայի Հանրապետությունը դարձավ առաջին երկիրը, որն սկսեց հինգերորդ սերնդի բջջային կապի առեւտրային շահագործումը։ Նրա ռեկորդային արագությունը կհասնի 25 Գբ/վ-ի։ Նման ցուցանիշները թույլ են տալիս առցանց ռեժիմում հեռարձակել տեսանյութեր 8K (Ultra HD)-ով։ Ինչպես սպասվում է, 6G ստանդարտը կփոխարինի կապի հինգերորդ սերնդին 2025 թվականից ոչ շուտ։