Նախնական նախագծի համեմատությամբ ոչ մեծ փոփոխություններ են կատարվել գրավատների համար 6 մլն դրամ, փոխանակման կետերի համար 3 մլն դրամ տուրք սահմանելու դրույթում՝ ներկայիս համապատասխանաբար 100 հազար եւ 50 հազար դրամի փոխարեն: Հունիսի 7-ին ԱԺ արտահերթ նիստում Հարկային օրենսգրքում փոփոխությունների քննարկման ժամանակ այս մասին ասաց ֆինանսների փոխնախարար, հիմնական զեկուցող Արման Պողոսյանը:
«Մենք փորձում ենք պետտուրքերի չափը նվազեցնել խոցելի կազմակերպությունների համար, իսկ ինստիտուցինալապես կազմավորվածների համար, որոնք կարող են այս բեռը կրել, մի փոքր բարձրացնել»,- պարզաբանեց Պողոսյանը: Նրա խոսքով՝ հաջորդ փոփոխությունը անդրադառնում է մասնավոր տաքսիստներին, որոնք գործում են որպես ֆիզիկական անձինք: Պաշտոնյան նշեց, որ առաջարկվում է նրանց ազատել պետտուրքի վճարումից: Նախագծով նաեւ առաջարկվում է նվազեցնել հանրային սնունդի կազմակերպությունների հարկային բեռը՝ այն որոշելով 2018 թվականի երկրորդ կեսին հաստատված տոկոսադրույքով: Ինչ վերաբերում է բեռնափոխադրումների ոլորտին, ապա, փոխնախարարի խոսքով, առաջարկվում է բեռնափոխադրումներ իրականացնող տնտեսվարող սուբյեկտներին ազատել տրանսպորտային հարկից եւ ներդնել գործարքների ու արտասահմանում ծախսերի գրանցման առավել ճկուն համակարգ:
