Հայաստանը կարող է իր ավտոպարկը թարմացնել ԵՏՄ երկրներում արտադրված տրանսպորտային միջոցներով: Հունիսի 10-ին «ԵՏՄ-ում Հայաստանի նախագահության տարի. մարտահրավերներ եւ հնարավորություններ» թեմայով խորհրդարանական լսումների ժամանակ այս մասին ասաց էկոնոմիկայի նախարար Տիգրան Խաչատրյանը:
Նախարարից հետաքրքրվեցին՝ արդյոք չի՞ կարելի որոշ ժամանակով էլ հետաձգել երրորդ երկրներից ավտոմեքենաների ներմուծման միասնական մաքսային սակագների ուժի մեջ մտնելը: Պատգամավորները, մասնավորապես, նշեցին, որ ավտոմեքենա ներմուծողները դժգոհում են, որ միասնական սակագնի անցնելով Հայաստան կներկրվեն «խորհրդային նմուշի հին մեքենաներ»:
Խաչատրյանն այս պնդումներին կտրականապես չհամաձայնեց: Նա հիշեցրեց, որ «խորհրդային հին մեքենաները» ԵՏՄ տարածքում չեն արտադրվում: Նրա կարծիքով՝ ԵՏՄ տարածքում ավտոարդյունաբերության զարգացումը մուլտիպլիկատիվ տնտեսական էֆեկտ կունենա այս կառույցի բոլոր անդամ երկրների համար:
Փոխվարչապետ Մհեր Գրիգորյանն իր հերթին հայտարարեց, որ ավտոմեքենաների ներմուծման թեման բազմաշերտ է եւ մանրակրկիտ քննարկման կարիք ունի: «Եկեք, չթաքցնենք, որ Հայաստանի քաղաքացիները շահագրգռված են, որ մեքենաները հանրապետություն ներկրվեն ցածր սակագներով, որ այնուհետեւ դրանք հնարավորության դեպքում վաճառեն, այդ թվում, ԵՏՄ այլ երկրներում: Այս եւ այլ քայլերը կարելի է մանրամասն քննարկել եւ մշակել փոխշահավետ լուծումներ»,- ասաց Գրիգորյանը:
