Հայաստանում տուրիզմի զարգացման գլխավոր նախապայմանը դրական իմիջն է: Այս մասին այսօր Ազգային ժողովում նիստի ժամանակ հայտարարել է ՀՀ վարչապետ Նիկոլ Փաշինյանը՝ պատասխանելով պատգամավորների հարցերին:
Նրա կարծիքով՝ դրա համար կառավարությունն արդեն շատ բան է արել:
«Երկրորդը ենթակառուցվածքն ու ճանապարհներն են: Այժմ զբոսաշրջիկների հարմարավետության համար մենք ծրագրեր ենք իրականացնում: Կա վարկային ծրագիր տուրիզմի զարգացման պետական հանձնաժողովում մոտ 60 մլն դոլարի չափով, որը վերաբերում է ենթակառուցվածքի զարգացմանը»,- ասել է վարչապետը՝ հիշեցնելով, որ գազալիցքավորման կայաններում զուգարանների բարելավման աշխատանքներ են տարվում:
«Ինչպես նաեւ աշխատանքներ են տարվում էկոտուրիզմի զարգացման ուղղությամբ: Ակցիաներ կանցկացվեն՝ Հայաստանը որպես էկոտուրիզմի ուղղություն ներկայացնելու համար»,- նշել է Փաշինյանը:
Ընդ որում, նա չի համաձայնել այն կարծիքի հետ, որ որեւէ ոլորտի զարգացման համար հարկային արտոնություններ են անհրաժեշտ:
«Այսօր Հայաստանում ռեստորանները լիքն են: Մենք պատրաստվում էինք մեծացնել դրանց հարկային բեռը, սակայն համաձայնության եկանք եւ պահպանեցինք ներկայիս մակարդակը: Դա նույնպես հարկային արտոնություն է: Այժմ մենք ընդունում ենք օրենսգիրքը, որում կլինեն զարգացմանը նպաստող հարկային թուլացումներ»,- հայտարարել է նա:
