Որտե՞ղ եմ տեսնում խնդիրներ, որոնց պետք է ուշադրություն դարձնի կառավարությունը. Բյուջետային ծախսերը պետք է կատարվեն, եթե դու բյուջետային ծախսեր չես անում, մյուս կողմից տնտեսությունն աճում է վարկերի հաշվին, դա խնդիր է: Այս մասին Տավուշի մարզում «Իմ քայլը հանուն Տավուշի մարզի» համաժողովի ժամանակ լրագրողների հետ զրույցում նշեց Ֆինանսների նախկին նախարար Վարդան Արամյանը:
Նրա խոսքով, 2018-ին ունեցել ենք վարկավորման ծավալների աճ, ընդ որում հիմնական քաշող ոլորտները եղել են սպառողական վարկերն ու հիփոթեքը, մի մասն էլ գնացել է առեւտրի ֆինանսավորմանը:
«30 տոկոսով սպառողական վարկերն աճել են: Սպառողական վարկեր վերցնողները մենք ենք, տնային տնտեսությունները: Հիմա հարց, որտեղի՞ց վստահություն, որ վաղը ես այդ վարկերը կմարեմ: Դա պետք է լինի կամ աշխատավարձերի աճով պայմանավորված, մինչդեռ 2018-ին աշխատավարձերն աճել են 4 տոկոսով: Տնային տնտեսությունների համար մյուս աղբյուրը տրանսֆերտներն են, որոնք 2018-ին նվազում են գրանցել: Այստեղ մտահոգվելու տեղ ունենք:
Հաջորդ մտահոգիչ փաստը բյուջետային ծախսեր կատարելն է, որի մասին նաեւ վարչապետը խոսեց: Բյուջեն հավելուրդային է, այդքան գումար կա, բայց չի մտել տնտեսություն: Այդ բացը փակվել է վարկերի միջոցով»,-ասաց նախկին նախարարը: