Կրեմլը շարունակում է աշխատել Օսակայում Ռուսաստանի Դաշնության եւ ԱՄՆ նախագահների՝ Վլադիմիր Պուտինի եւ Դոնալդ Թրամփի հանդիպման պատրաստման ուղղությամբ, ակնկալվում է, որ այդ շփումը տեղի կունենա։ Այս մասին լրագրողներին ասել է ՌԴ նախագահի մամուլի քարտուղար Դմիտրի Պեսկովը, տեղեկացնում է ՏԱՍՍ-ը։
«Նման նախապատրաստություն կատարվում է, եւ մենք չենք բացառում, որ նման հանդիպում կարող է կայանալ»,- ասել է Կրեմլի ներկայացուցիչը։
Պեսկովը ճշգրտել է, որ Անվտանգության խորհրդի քարտուղար Նիկոլայ Պատրուշեւի հանդիպումն Իսրայելի եւ ԱՄՆ իր պաշտոնակիցների հետ կարելի է դիտարկել որպես Ռուսաստանի եւ ԱՄՆ նախագահների գալիք հանդիպման պատրաստության մի մաս։ Ընդ որում՝ Պեսկովը հրաժարվել է մեկնաբանել Սիրիայի վերաբերյալ ձեռք բերված պայմանավորվածությունները։ «Ավելին, քան ասաց Պատրուշեւը մամուլի հետ շփման ժամանակ, ես ասել չեմ կարող»,- ասել է պետության ղեկավարի մամուլի քարտուղարը։
Ավելի վաղ ՌԴ Անվտանգության խորհրդի քարտուղար Նիկոլայ Պատրուշեւը, Երուսաղեմում ԱՄՆ նախագահի ազգային անվտանգության գծով օգնական Ջոն Բոլթոնի եւ Իսրայելի Ազգային անվտանգության խորհրդի ղեկավար Մեիր Բեն-Շաբաթի հետ եռակողմ հանդիպման ավարտից հետո ասել էր, որ Ռուսաստանը կոչ է անում ամերիկյան եւ իսրայելական կողմերին միավորել ջանքերը Սիրիայում մնացած բոլոր ահաբեկիչներին վերացնելու գործում։
