Արքայադուստր Դիանան պատրաստ էր նկարահանվել «Թիկնապահը» (The Bodyguard, 1992) ֆիլմի շարունակության մեջ, սակայն այդ ծրագրերը չիրականացան 1997 թվականի օգոստոսին Փարիզում նրա մահվան պատճառով: Այս մասին People ամսագրին տված հարցազրույցում ասել է դերասան Քեւին Քոսթները, որը «Թիկնապահը» ֆիլմում խաղացել է երգչուհի Ուիթնի Հյուսթոնի հետ, հաղորդում է ՏԱՍՍ-ը:
Դերասանի խոսքով՝ արքայադուստր Դիանան մտահոգություն էր հայտնում՝ կապված ֆիլմում իր դերի հետ: «Հիշում եմ՝ ինչպես էր նա հեռախոսով սիրալիր խոսում եւ հարցեր տալիս, օրինակ, արդյոք նա պետք է նկարահանվի համբույրի տեսարանում: Նա շատ հարգալից էր խոսում: Արքայադուստրն անհանգստանում էր, քանի որ նրա կյանքը շատ էին քննարկում»,- պատմել է Քոսթները՝ նշելով, որ իսկապես սիրային տեսարաններ էին ծրագրում շարունակության մեջ:
Քոսթներն առաջին անգամ պատմել է, որ Դիանայի հետ հեռախոսազրույցն օգնել է իրականացնել Մեծ Բրիտանիայի թագուհու որդու նախկին կինը՝ Սառա Ֆերգյուսոնը:
Սակայն այդ ծրագրերը չիրականացան: Դերասանը ստացավ ֆիլմի սցենարն արքայադստեր մահվանից մեկ օր առաջ:
1997 թվականի օգոստոսի 31-ին արքայադուստրն իր ընկերոջ՝ Դոդի ալ-Ֆայեդի հետ վթարի ենթարկվեց Փարիզում: Ողջ մնաց միայն նրա թիկնապահը: Հետաքննության արդյունքներով, որոնք հրապարակվել են 2006 թվականին, ավտովթարը նախապես ծրագրված չի եղել: