Հայաստանի երկրորդ նախագահ Ռոբերտ Քոչարյանի փաստաբանները որոշ օրինաչափություն են տեսնում դատավարության եւ դատական համակարգի բարեփոխումների մասին խոսակցությունների միջեւ: Հուլիսի 3-ին մամուլի ասուլիսի ժամանակ այսպիսի կարծիք հայտնեցին փաստաբանները:
Փաստաբան Հովհաննես Խուդոյանի խոսքով՝ որոշ օրինաչափություն կա այն բանում, որ հենց դատարանը Ռոբերտ Քոչարյանին ազատ է արձակում, ակտիվանում են դատական բարեփոխումների, վեթինգի, անցումային արդարադատության քննարկումները: Հենց դատարանը որոշում է Քոչարյանին կալանավորել, քննարկումները դադարում են: Փաստաբան Արամ Օրբելյանը հստակեցրեց, որ փաստաբանները համահարաբերակցություն են տեսնում, բայց փաստերի անբավարարության պատճառով չեն կարող մատնանշել պատճառահետեւանքային կապը: Անցումային արդարադատության մասին խոսելով Ռոբերտ Քոչարյանի դատավարության ենթատեսքտում՝ փաստաբան Արամ Օրբելյանը հիշեցրեց, որ անցումային արդարադատությունը չի նախատեսում մասնագիտացված դատարաններ, ուղղված է ոչ թե մեղավորների որոնմանը, այլ կոչված է լինելու հաշտեցման միջոց: Այսպիսով «Մարտի 1-ի» գործը պետք է քննվի ավանդական միջոցներով, բայց նոր տարրերը բացառված չեն:
Փաստաբանները նաեւ հայտնեցին մոտ ժամանակում վճռաբեկ բողոքներ ներկայացնելու մտադրության մասին:
Հիշեցնենք, որ ներկայումս Ռոբերտ Քոչարյանի եւ մյուս բարձրաստիճան պաշտոնատար անձանց դեմ դատավարությունը անհասկանալի վիճակում է: Մի կողմից Վերաքննիչ դատարանը գործը վերադարձրել է առաջին ատյանի դատարան: Ընդ որում՝ փաստաթղթերը մնում են Վերաքննիչում՝ բողոքարկման դեպքի համար, եւ նման պահվածքը, ինչպես պնդում են փաստաբանները, դատավարությունն արգելակում է ի վնաս պատասխանողի շահերի: Մյուս կողմից՝ Սահմանադրական դատարանը երկարացրել է առաջին ատյանի դատարանի դիմումի քննությունը: Փաստաբանները նշում են, որ Վերաքննիչ դատարանի դիրքորոշումն, ընդհանուր առմամբ, խախտում է առաջին ատյանի դատարանի իրավունքները, քանի որ գործը ՍԴ փոխանցելու որոշումը բողոքարկման ենթակա չէ, իսկ մյուս կողմից՝ դիմումի էության քննության հետաձգումը ամբողջ դատավարությունը գլխիվայր շրջում է:
