Եվրամիության ակտիվ մասնակցությունը Արեւելյան Եվրոպայի եւ Հարավային Կովկասի երկրներում ժողովրդավարական բարեփոխումներ անցկացնելու գործում կարեւոր նշանակություն ունի ամբողջ մոլորակի անվտանգության եւ տնտեսության ապագայի համար: Այս կարծիքն է հայտնել Լեհաստանի արտգործնախարար Ռադոսլավ Սիկորսկին The Wall Street Journal թերթում լույս տեսած իր հոդվածում:
Սիկորսկին կոչ է անում բարեկամության ձեռք մեկնել Արեւելյան Եվրոպային: Նա Եվրամիությանը խորհուրդ է տալիս չանտեսել այդ երկրներին միություն ընդունելու հեռանկարի նշանակությունը, քանի որ «Եվրամիություն մտնելու հրապուրիչ հեռանկարն այն հիմնական միջոցն է, որի օգնությամբ նա կարող է ազդել այդ երկրների վրա», ասում է նա:
Սիկորսկիի կարծիքով, այդ երկրների բնակիչները եվրոպացիներ են, իսկ այն, որ Արեւելյան Եվրոպայում քաղաքացիական հասարակությունն ու տնտեսությունը զարգացած չեն, ժողովրդավարական ինստիտուտների պակաս կա եւ դատական համակարգն էլ անարդյունավետ է` հետեւանք է այն բանի, որ նրանք ընդամենը 18 տարի առաջ են անկախություն ձեռք բերել:
Սիկորսկին համարում է, որ քաղաքականության տեսանկյունից «Արեւելյան գործընկերությունը» հնարավորություն է ընձեռում, որպեսզի մասնակից երկրներն իրենց անկախ պետություններ զգան, այլ ոչ թե «զինվորներ, որոնք օրգանապես կապված են Ռուսաստանի հետ»:
Նա կարծում է, որ Ռուսաստանի գործողությունները պետք է գնահատել նրա «հավակնությունների, ծանր անցյալի» եւ ներկայում Եվրոպային ինտեգրվելու համատեքստում: «Եթե մենք կարծում ենք, որ Ռուսաստանի ապագան Եվրամիության հետ գործընկերությունն է, ապա այդ նույն ապագայի հեռանկարը չպետք է մերժել նաեւ Արեւելյան Եվրոպայի եւ Հարավային Կովկասի երկրների դեպքում», գրում է Սիկորսկին: Նրա տեսակետից, այդ պետությունների ինտեգրումը Եվրամիությանը կարող է նպաստել հենց իր` Ռուսաստանի եվրոպամետ կողմնորոշմանը:
