Սաուդյան Արաբիան եւ Արաբական Միացյալ Էմիրությունները միացյալ կոմիտե են ստեղծել հարավային Եմենում հրադադարի ռեժիմի կայունացման համար, հայտնում է սաուդյան SPA գործակալությունը:
Ավելի վաղ տեղեկություններ էին հրապարակվել, որ այս 2 երկրներն աջակցում են Եմենի հարավում միմյանց դեմ հակամարտող կողմերին. Սաուդյան Արաբիան՝ Հադիի եմենյան կառավարությանը, ԱՄԷ-ն հարավի անջատողականներին:
Սաուդյան գլխավորությամբ արաբական կոալիցիայի պաշտոնական ներկայացուցիչ Թուրքի ալ Մալիքին հայտարարել է, որ Սաուդյան Արաբիայի եւ ԱՄԷ-ի ստեղծած միացյալ կոմիտեն կսկսի աշխատել երկուշաբթի:
Կոմիտեն կզբաղվի Եմենի հարավային 7 նահանգներից երկուսում հրադադարի կայունացմամբ՝ Շաբվայում եւ Աբյանեում: Խնդիր է դրված նաեւ ավարտել Ադեն նահանգում իրավիճակի կարգավորմանն ուղղված ջանքերը:
Ալ Մալիքին բոլոր կողմերին կոչ է արել հարգել Եմենի ազգային շահերը:
