Կալիֆոռնիայի տեխնիկական ինստիտուտի գիտնականները, օգտագործելով երեք աստղադիտարանների տվյալները, հայտնաբերել են հսկայական էկզոմոլորակ, որին տրվել է HR 5183 b անվանումը։ Աստղաֆիզիկոսների տվյալներով՝ այդ օբյեկտը գտնվում է Կույսի համաստեղությունում եւ Երկրից հեռու է 102 լուսային տարի, տեղեկացնում է Planet-today-ը։
Հայտնաբերված էկզոմոլորակը նման չէ գիտնականներին ներկա պահին հայտնի մոլորակներից ոչ մեկին։ Այն երեք անգամ գերազանցում է Յուպիտերի զանգվածը։ Դրա առանձնահատկություններից մեկն է նաեւ էլիպսաձեւ ուղեծիրը, որով մեկ շրջանը տեւում է 45-100 տարի։ Ընդ որում՝ ժամանակի մեծ մասը մոլորակն անցկացնում է համակարգի արտաքին մասում, բայց աստղին առավելագույնս մոտենալու պահին ստանում է մեծ արագացում եւ արագ հեռանում է իր հետագծով։
Ինչպես նշում են ամերիկացի հետազոտողները, եթե այդ մոլորակը գտնվեր Արեգակնային համակարգում, ապա ուղեծրով տատանումներ կունենար Մարսից եւ աստղակերպերի գոտուց մինչեւ Նեպտունի սահմանները։ Գիտնականների կարծիքով՝ այդ երեւույթի պատճառը կարող է լինել այն, որ մոլորակը ձեւավորվել է այլ կերպ, դրսից հզոր ազդեցության պատճառով, իսկ նրա հատուկ ուղեծիրը դարձել է համեմատելի չափերով այլ մոլորակի հետ պատահական ձգողական փոխգործակցությունների արդյունք, որը դուրս է նետվել աստղային համակարգից։