Պենտագոնի ղեկավար Մարկ Էսպերը Եվրոպային կոչ կանի ավելի մեծ ուշադրություն հատկացնել Չինաստանի եւ Ռուսաստանի կողմից «աճող սպառնալիքներին», հաղորդում է Reuters-ը:
«Առավել ակնհայտ է դառնում, որ Ռուսաստանն ու Չինաստանը ցանկանում են խախտել միջազգային կարգը՝ վետոյի իրավունք ստանալով տնտեսության, դիվանագիտության եւ անվտանգության ոլորտներում այլ երկրների որոշումների վրա: ԱՄՆ-ը դեմ առ դեմ բախվում է այդ խնդրի հետ, սակայն մենք ցանկանում ենք խաղաղություն պահպանել, մենք բոլորս պետք է բարձունքի վրա լինենք»,- ասվում է Էսպերի ելույթում, որով նա հանդես կգա Միացյալ Թագավորության պաշտպանության հետազոտությունների արքայական քոլեջում:
ԱՄՆ-ի եւ Չինաստանի հարաբերությունները սրվում են առեւտրային պատերազմի, Չինաստանի զինված ուժերի դեմ ամերիկյան պատժամիջոցների եւ Թայվանի հետ ԱՄՆ հարաբերությունների ֆոնին:
Նախապատրաստած մեկնաբանություններում Էսպերը նկարագրել է Չինաստանի առնչությամբ մտավախությունների մի ամբողջ շարք՝ տնտեսական ուժի կիրառումից մինչեւ տեխնոլոգիաների գողություն:
Նա այդ թվում նշել է Հոնկոնգի իրավիճակը, որտեղ մի քանի ամիս է՝ շարունակվում են կառավարության դեմ ցույցերը:
«Մենք բոլորս տեսնում ենք՝ ինչ է այնտեղ կատարվում, տեսնում ենք, թե ինչ է կատարվում նրանց հետ, ովքեր դեմ են Հոնկոնգում Կոմունիստական կուսակցության ազդեցությանը»,- ասել է Էսպերը:
Նա նաեւ նշել է ռիսկերը, որոնք ներկայացնում է Ռուսաստանը, հարեւան երկիր ներխուժելուց մինչեւ Սիրիայի գործողություններ:
«Այլ կերպ ասած՝ Ռուսաստանի արտաքին քաղաքականությունը շարունակում է անտեսել միջազգային նորմերը»,- նշել է Պենտագոնի ղեկավարը:
