![](img/news/05/32/53/default.jpg)
Շիրակի մարզի Առափի գյուղում սողանքի հետեւանքով տուժած բնակիչները արդեն մեկ շաբաթ է տարհանված են եւ ապրում են բնակարանում, որը կրկին սողանքային գոտում է:
«Գյուղում արձանագրված փլուզման դեպքից եւ իմ ընտանիքի տարհանումից անցել է ուղիղ մեկ շաբաթ: Վերին ատյաններում այս խնդրին մատների արանքով են նայում: Չեն պատկերացնում, որ սարը գալիս է մարդկանց վրա, 10 ընտանիք վտանգի տակ է: Հակառակ դեպքում, գոնե կհետաքրքրվեին ու կտեղեկանային, թե որտեղ եւ ինչ պայմաններում է ապրում շտապ տարհանված ընտանիքը, կամ արդյոք շարժվող սարը չի՞ վնասել նաեւ սողանքային գոտում գտնվող մյուս բնակարանները: Եւ եթե վտանգն առկա է, ապա ինչ քայլեր են պետք ձեռնարկել»,-NEWS am-ի թղթակցի հետ զրույցում դժգոհել է տարհանված ընտանիքի հայր Ռուստամ Պողոսյանը:
Պետական մակարդակով այս ընտանիքին ոչինչ չի առաջարկվել: Ընտանիքի անդամ Արմինե Պողոսյանն իր հերթին նշել է. «Ըստ օրենքի, բնական աղետների, այդ թվում սողանքների պատճառած վնասների դեպքում, բնակչի հետագա ճակատագրով պետությունն է զբաղվում՝ մասնավորապես փոխհատուցում է բնակարանատիրոջ կրած նյութական վնասները, այնուհետեւ լուծելու է վերջինիս բնակարանային խնդիրը: Այնինչ, գույքը տեղափոխելու համար մեկ տրակտոր միայն գյուղապետարանն է տրամադրել»,-ասել է Արմինե Պողոսյանը:
Հիշեցնենք, որ մեկ շաբաթ առաջ սողանքի պատճառով Առափիում սարը շարժվել էր, մասնակի փլուզման էին ենթարկվել 2 տներ: Ընտանիքներից մեկին տարհանել էին` սողանքային գոտում գտնվող մեկ այլ բնակարան տրամադրելով: Երկրորդ ընտանիքին առաջարկել էին որպես բնակատեղի` զբաղեցնել Առափիի գործող դպրոցի դասասենյակներից մեկը: Երկրորդ ընտանիքը մինչեւ այժմ մնում է իր բանակարանում: Բացի այդ, եւս 8 ընտանիք Առափիում անհապաղ տարհանման ենթակա է: