![](img/news/05/32/55/default.jpg)
Շիրակի մարզի սահմանային Արեգնադեմ համայնքը, որը գտնվում է մարզկենտրոնից 21, իսկ մայրաքաղաքից 141 կմ հեռավորության վրա, դատարկվում է, քանի որ գյուղում չկա զբաղվածություն եւ պետական հոգածություն: Այս մասին այսօր` մարտի 29-ին Գյումրիում կազմակեպված քննարկմն ժամանակ նշել է Շիրակի մարզի Արեգնադեմի գյուղապետ Աղունիկ Հազրյանը:
«Համայնքը միակն է մարզի գյուղերից, որ դպրոցական մասնաշենք չունի: Գյուղի երեխաների համար առանձնացրել ենք 3 սեփական տներ`100-140 քմ մակերեսով: Սեփական տների սենյակներն էլ հարմարեցրել ենք, որպես դասասենյակներ: Գյուղապետարանն էլ գործում է սեփական տան մեջ»,- ասել է նա ու հավելել, որ գյուղը չունի նաեւ խմելու, ոռոգման ջրացանցեր, գյուղտեխնիկա , բերքի իրարացման շուկա ու գազ:
Բոլոր այս խնդիրների մասին գյուղապետ Աղունիկ Հազրյանը բարձրաձայնել է թե’ լրատվամիջոցներով, թե’ պաշտոնական գրություններով ու նամակներով, սակայն գյուղ այցելող ու Արեգնադեմի խնդիրներով հետաքրքրվող չկա:
Դրա համար էլ գյուղապետն ինքն է եկել մարզկենտրոն ու կազմակերպված քննարկման ժամանակ փոքրիկ գյուղի մեծ խնդիրներն է բարձրացնում, հրավիրում մարդկանց, ովքեր կկամենան խաղհրապարակ կամ մանկապարտեզ կառուցել գյուղում: Առաջարկում է մեկ անգամ էլ ծառատունկ կազմակերպել ոչ թե մեծ քաղաքներում ու հայտնի պուրակներում, այլ Արեգնադեմում: Մարզպետարանի համապատասխան վարչության մասնագետները հավաստում են, որ շուտով զարգացման ծրագրերը կհասնեն նաեւ Արեգնադեմ: