Թող ինչ-որ երկրորդ կարգի ընկերություն չմտածի, թե կարող է ղեկավարել Հայաստանում։ Այս մասին հայտարարեց Աշոտ Աշոտյանը, ով ներկայացավ որպես սպորտի միջազգային որակավորման վարպետ, կարատեի ֆեդերացիայի նախագահ, քաղաքացիական նախաձեռնության հիմնադիր։
«Ես լսել եմ արտահայտություն, թե անձեռնմխելի է վարչապետը, ինչպես անձեռնմխելի է Ամուլսարը։ Չկա անձեռնմխելի մարդ։ Սակայն Ամուլսարն անձեռնմխելի է։ Ժողովուրդն ընդունել է իր որոշումը։ Մեկուկես տարի, թողնելով տները, ծեր ու մանուկ պահում են պաշտպանությունը։ Սա հայերի ցեղասպանության խնդիր է։ Ինչպես դա վերաբերում է ձեզ, այնպես էլ վերաբերում է Երեւանի եւ երկրի բնակիչներին։ Սա միջազգային կոռուպցիայի արդյունք է»,- նշեց նա։
«Մենք պատրաստ ենք արձագանքել առաջին իսկ կանչին։ Ոչ մի քայլ հետ։ Պետք լինի՝ կպառկեմ ճանապարհին։ Ոչ ոք դրսից կամ որեւէ այլ տեղից չի կարող որոշել մեր փոխարեն։ Մենք ենք որոշելու։ Ոչ թե խոսքով, այլ գործով։ Հարգելի ջերմուկցիներ, մի կարծեք, թե մենակ եք։ Մենք ձեզ հետ ենք առաջին իսկ կանչով»,- վստահեցրեց Աշոտ Աշոտյանը՝ խոստանալով մոտ ժամանակներս հաստատել իր ասածները։
Ջերմուկի բնակիչ Արմեն Խաչատրյանը կիսեց իր տպավորությունները վարչապետի հետ հանդիպումներից․ «Տպավորությունն այնպիսին է, որ Ջերմուկի բնակիչները պետք է փրկեն երկիրը, ստացվում է ամբողջ տնտեսությունը մեզնից է կախված»։ Ճանապարհը չի բացվի, եւ հանքավայրը չի շահագործվի, ընդգծեց Խաչատրյանը՝ հավաստիացնելով, որ եթե 90 օրվա ընթացքում խախտումները չվերացվեն, հանքավայրը կփակվի եւ կճանաչվի անգործունակ։ Ջերմուկցիները կայացրել են իրենց որոշումը՝ Ամուլսարը կմնա սար, ամփոփեց Խաչատրյանը։