Ամուլսարի մշակման նախագիծը սպառնալիքի տակ է դնում ողջ հայոց ազգին։ Այս մասին ամուլսարի հարցով ջերմուկցիների հանդիպմանը հայտարարեց Ջերմուկի բնակիչ, ղարաբաղյան պատերազմի մասնակից Ռուստամ Աղաջանյանը։
Համահայկական ազգային համերաշխության պատասխանատու քարտուղար Հրայր Ավինյանը հիշեցրեց, որ Անկախության հռչակագրում ասվում է, թե ջուրն ու հողը պատկանում են ժողովրդին։ «Որպես Ջերմուկի հողի սեփականատեր, ես հանքավայրի շահագործման համաձայնություն չեմ տվել։ Ներդրումների մասին խոսել եւս չի կարելի, քանի որ «Լիդիանը» չի ապացուցել, որ կոռուպցիոն գործարքների մեջ չի մտել։ Մեր կառույցը ձեզ հետ է, թանկագին ջերմուկցիներ»,- ընդգծեց Հրայր Ավինյանը։
Հիշեցնենք, որ այսօր առավոտյան վարչապետ Նիկոլ Փաշինյանը Facebook-ի ուղիղ եթերում հայտարարել էր հանքավայրի շահագործումն արգելելու օրինական հիմքերի բացակայության մասին։ Ի պատասխան, Ջերմուկի բնակիչները, որոնց ուղղակիորեն սպառնում է հանքավայրը, պայմանավորվել են հանդիպում-քննարկման մասին։ Հանդիպման արդյունքներով կընդունվի հայտարարություն։