Թուրքիայի ԱԳՆ-ը վճռականորեն մերժել է «Խաղաղության աղբյուր» գործողությունների պատճառով պատժամիջոցների վերաբերյալ Եվրախորհրդարանի (ԵԽ) բանաձեւն ու Եվրոպայի դիրքորոշումը սխալ եւ կանխակալ անվանել: Այս մասին ասվում է գերատեսչության կայքում, հաղորդում է ՏԱՍՍ-ը:
«Ամբողջությամբ մերժում ենք «Խաղաղության աղբյուր» գործողությունների մասին ԵԽ բանաձեւը: Զարմանալի չէր նման որոշումը խորհրդարանի կողմից, որը մշտապես ահաբեկիչների է ընդունում»,- ասվում է հայտարարության մեջ: Տվյալ դեպքում ահաբեկիչներ ասելով Թուրքիայի ԱԳՆ-ը նկատի է ունեցել ԵՄ-ում քուրդ քաղաքական գործիչներին, որոնց Անկարան մեղադրում է Քրդական բանվորական կուսակցության հետ կապի մեջ, որը թուրքերը ահաբեկչական են ճանաչել:
«Ավելի վաղ մենք բազմիցս հայտարարել ենք, որ գործողություններն իրականացվում են միջազգային օրենսդրությանը, ՄԱԿ-ի կանոնադրությանն ու ՄԱԿ-ի ԱԽ-ի որոշմանը համապատասխան: ԵԽ որոշման մեջ նշված փաստարկները մերժվել են: ԵԽ բանաձեւը կապ չունի իրականության հետ, այն կանխակալ է, սխալ եւ զուրկ ողջամտությունից»,- նշվում է Թուրքիայի ԱԳՆ-ի հայտարարության մեջ: Բացի այդ, նշվում է, որ ԵԽ-ը «չի հետեւում միջազգային օրակարգին, չի կարողանում օբյեկտիվորեն գնահատել իրադարձություններն ու արդյունավետ եւ ճիշտ ռազմավարություն ընտրել»:
Ավելի վաղ ԵԽ-ը բանաձեւ էր ընդունել, որով հանդես է գալիս Եվրոպայի խորհրդի կողմից Թուրքիայի դեմ նրա ռազմական գործողությունների պատճառով «համապատասխան եւ նպատակային տնտեսական միջոցառումներ» ձեռնարկելու օգտին: Խորհրդարանը նաեւ Եվրոպայի խորհրդին կոչ է արել «Սիրիայի հյուսիս-արեւելքում իրավիճակի սրացումից խուսափելու նպատակով վերանայել առեւտրային բանակցությունների դադարեցման, ծայրահեղ դեպքում՝ ԵՄ-ի եւ Թուրքիայի միջեւ մաքսային միության գործողությունների դադարեցման հարցը»:
Բանաձեւում ասվում է նաեւ, որ Եվրամիության արտաքին քաղաքականության ծառայության ղեկավարը պետք է հանդես գա «նախաձեռնությամբ՝ ուղղված Թուրքիա զենքի, ներառյալ սարքավորումների եւ երկակի նշանակության տեխնոլոգիաների մատակարարումների համար ԵՄ համապարփակ էմբարգոյի սահմանմանը»:
